Fundacion Amigonan di Archivo a inicia na januari 2018 cu un proyecto relaciona cu e archivo di Boy Ecury cu ta warda na Archivo Nacional Aruba (ANA). Intencion di e proyecto tabata pa inventarisa, restaura y digitalisa e archivo pa asina haci’e mas accesible pa investigacion. Na final di e proyecto (december 2018) lo tin inventario completo y un guia di investigacion pa asina entrega esaki na ANA y comparti e informacion valioso aki cu comunidad.
Como parti di e proyecto a inclui un programa di scol, pa asina den forma di un presentacion hiba e historia di Boy Ecury na e muchanan. Den cuadro di esaki dia 5 y 6 di november ultimo e lider di e proyecto srt. Daniella Britt conhuntamente cu representantenan di Archivo Nacional Aruba a bishita 4 diferente basisschool na Aruba pa conta e muchanan e storia di Boy Ecury.
Dia 6 di november tabata 74 aña desde cu Boy a wordo fusila riba Waalsdorpervlakte dor di Alemannan. A papia cu e muchanan di 5e klas tocante guera, ken Boy tabata, kico el a haci durante e guera y dicon. A discuti tambe e aspecto di “libertad” como un bien di humanidad, cu personanan cu a resisti e ocupacion Aleman na e.o. Hulanda, cu a logra segura pa futuro generacionnan. Ademas a conta un tiki tocante e experiencia na Aruba durante e guera. E muchanan a siña tocante e rol di LAGO y con esaki a haci Aruba vulnerable pa un atake Aleman. E muchanan tabata hopi interesa den e topico, a scucha cu hopi interes y tabata haci hopi pregunta. Docentenan a mustra interes pa haya mas material pa asina por trata e topico den klas. Fundacion Amigonan di Archivo kier a gradici SKOA pa e autorizacion y na e cabesantenan, docentenan y muchanan di Sint Paulus School, Sint Dominicus College, Sint Anna School y Colegio San Hose pa nan bon cooperacion.
E proyecto di Boy Ecury a wordo haci posible cu financiamento di Vfonds (Het Nationaal fonds voor Vrede, Vrijheid en Veteranenzorg) Nederland, Prins Bernhard Cultuurfonds Caribbean y UNOCA Aruba.
E presentacion a wordo graba y ta disponible pa otro scolnan cu kier mira esaki. Pa mas informacion por tuma contacto cu Archivo Nacional Aruba na telefoon 583-4880.