Relaciona cu e proyecto di Boy Ecury di Fundacion Amigonan di Archivo, a organisa un debate riba e topico di “Paz, Libertad y Resistencia”, cu e hobennan di Fundacion Parlamento Hubenil. E proyecto di Boy Ecury ta relaciona cu e archivo di e famia Ecury cu ta warda na Archivo Nacional Aruba.
E hobennan den un forma hopi professional a debati cu otro riba 3 ponencia: 1). “Nos no ta den guera, ta pa kico nos tin cu enfoca riba paz y libertad”, 2). “Nos no ta conciente cu mester para keto y balora nos libertad”, 3). “Ta acepta inhusticia pasobra tin falta di curashi pa forma resistencia”.
E hobennan cu a participa den e proyecto tabata: Camron Pantohoplet, Emanuel Koolman, Giovanna Carisal, Leonardo Figaroa, Minouche Ruiz, Samuel Jones, Sherona Manuela, Chloe Ruiz, Joshua Tromp, Dominique Lopez,
Moderador: Steve Geerman, Technico: Alex Rampersaud, Organisador: Faridi Dorff
Fundacion Amigonan di Archivo kier a gradici lider di e proyecto di Boy Ecury; Srt. Daniella Britt, Fundacion Parlamento Hubenil; Sra. Jessica Koolman, Jacky Nissa y tur e hobennan cu a participa den e realisacion di e debate, particularmente e hoben dinamico organisador Srt. Faridi Dorff. Un danki tambe na Universidad di Aruba pa nan cooperacion y aporte y especialmente e trainer di e hobennan Sra. Yolanda Richardson y tur esnan cu den un of otro forma a haci e proyecto aki possibel.
E debate ta e ultimo parti di e proyecto di Boy Ecury, cu a wordo organisa pa Fundacion Amigonan di Archivo, den cuadro di e “Aña di Resistencia” y financia pa vFonds (Fonds voor Vrede, Vrijheid en Veteranenzorg) di Hulanda, Prins Bernhard Cultuurfonds Caribbean y UNOCA.
Cu finalisacion di e proyecto e archivo di Boy Ecury ta completamente inventarisa, digitalisa, restaura y e coleccion ta digital disponibel. Tambe a traha un guia di investigacion (onderzoeksgids) cu e historia di Boy Ecury pa asina comparti esaki cu e comunidad y particularmente nos muchanan di scol. E guia pronto lo ta disponibel pa comparti cu comunidad.