Diamars ultimo, dia 4 di December 2018, Fundacion Amigonan di Archivo a clausura su proyecto di Boy Ecury. E evento a tuma luga na e busto di Boy Ecury sigui pa un presentacion den e parke di Boy Ecury (situa dilanti Juliana School).
E proyecto di Boy Ecury ta relaciona cu e archivo di e famia Ecury cu ta warda na Archivo Nacional Aruba. Cu e proyecto a inventarisa, digitalisa, restaura y haci e coleccion digital disponibel.
E resultado ta un inventario completo di tur e material cu tin disponibel di Boy Ecury y tambe a traha un guia di investigacion (onderzoeksgids) cu e historia di Boy Ecury pa asina comparti esaki cu e comunidad y particularmente nos muchanan di scol. E proyecto ta di Fundacion Amigonan di Archivo y a wordo ehecuta dor di srt. Daniella Britt.
E financiadornan di e proyecto tabata vFonds (Fonds voor Vrede, Vrijheid en Veteranenzorg) di Hulanda, Prins Bernhard Cultuurfonds Caribbean y UNOCA.
Pa e anochi aki, kier a gradici tur e persona-y instancianan cu a haci esaki possible. Un danki na: Hefe y personal di Archivo Nacional Aruba, vFonds, Prins Bernhard Cultuurfonds Caribbean, Unoca, VNO, Shayna Geerman, Daniella Britt, Directie Cultuur Aruba, director y especialmente Jhon Freddy Montoya y su team consistiendo di Alexander y Irina Berkley, Lupita Bernabela, Micheal Paesch, Johnny Sharbaay, Pedro Chencho Kelly, Franklin Granadillo y Roland Jansen.
Un danki na Sr. Albert de Veer pa e cooperacion extenso y pa por a haci uso di e parke pa e occasion asina special, Famia di Oslin “Chin” Boekhoudt d.f.m. pa e permiso pa usa e obra teatral den nos programa y Steffen Maas pa e bunita potret/obra cu a duna como donacion na e proyecto. Y tambe un danki special na artista Beach Lama pa su presentacion durante e programa.
E resultado final di e proyecto, esta e Guia di Investigacion (Onderzoeksgids) pronto lo ta disponibel pa comparti cu e comunidad. Dentro di poco lo anuncia esaki.