Minister di Husticia a ricibi na su despacho, un delegacion di miembronan di interpol. E bishita di trabou aki, ta pa splica e mandatario e fusion di lasonan mas estrecho cu cada pais den reino Hulandes a forma cu otro pa cu nan departamento. Segun nan a splica e minister, cu nunca antes paisnan den reino a forma nan propio grupo, involviendo dicho departamento di cada pais. Teniendo na cuenta nan trabou diario y e relevancia di por traha hunto cu otro, compartiendo informacionnan contundente pa combati criminalidad, ta un di e topiconan den comun cu nan tin. E grupo di coleganan internacional aki cu ta na Aruba pa un reunion di dos dia, ta consisti di pais Sint Maarten, representa pa e Head of NCB, sr. Ronald Stassen, pais Curacao, representa pa Head of NCB, sr. Norbert Minguel hunto cu deputy head of NCB Prisco Francisca, pais Hulanda ta wordo representa pa e deputy head of NCB esta sr. Peter Horsten y tambe e Liaison Officer voor het Caribisch gebied Ruud van Dalen, mientras cu pa pais Aruba esaki ta wordo representa pa sr. Anthony Lambrinos kende ta e Chief of NCB. Minister di husticia Dowers ta hopi contento cu e iniciativa cu e pais nan aki den reino a tuma, mirando cu esaki ta netamente loke su persona a bin ta inculcando den e departamento nan cu ta resorta bou di su cartera. Por ultimo, minister di husticia mr. drs. Arthur Dowers ta desea e grupo aki hopi exito cu nan trabou. Entre tanto por mira cu e pais nan aki kendenan ta miembro di Interpol ta duna un contenido real na e slogan di interpol cual ta “Connecting Police for a safer world”, cual traduci na Papiamento lo ta, Conectando Polis pa un mundo mas sigur. Interpol mes a conoce su di 85 president den nomber di sr. Meng Hongwei, (China) kende a keda elegi durante asamblea general cu a wordo organisa na Bali Indonesia, na 2016 y lo keda den e function aki te cu aña 2020.