Diaranson ultimo, na oficina di Censo, 13 funcionario a huramenta como empleado di e departamento gubernamental. E funcionarionan publico aki bin ta forma parti di e reorganisacion di e departamento cu a cuminsa na 2010.
Discursonan a wordo duna pa entre otro Sharin Luydens di Censo, Omaira Lares di DRH y Prome Minister di Pais Aruba, Mike Eman.
Den e discursonan palabranan manera norma, balornan y integridad a bini dilanti tanto den discurso di director di Censo Sharin Luydens como di Prome Minister Mike Eman. A papia di e balor di sirbi pais, un servicio di 5 strea, un servicio cu nan mes como cliente lo kier haya. Director di Censo tambe a expresa di ta orguyoso di e team ya cu e ta sinti di a pasa e pensamento di norma, balor y integridad pa su coleganan nobo.
Prome Minister Mike Eman di su banda a repasa con e pensamento di reorganisacion di Censo a surgi, e apoyo cu a haya semper di Gabinete di Gobernador y no por a keda sin menciona y recorda un persona cu a carga un gran parti di e proceso di reorganisacion for di su inicio, esta mr. drs. Piet Pronk (d.f.m.).
Un pa un e diestres funcionarionan a haci nan promesa di cumpli cu e norma y balornan di integridad, respetando Constitucion di Aruba, dilanti Gobernador Fredis Refunjol, y den presencia di directora di Prome Minister Eman, director di Censo Sharin Luydens, director di Departamento di Recursonan Humano Omaira Lares y Secretaria di Conseho di Minister Nicole Hoevertsz. Despues di e ceremonia a sigui un brindis chikito.