Diahuebs atardi, a bati alarma cu FMSA su Jet Fuel no a pasa un test cu normalmente ta wordo hasi serca aeroliñanan. FMSA su practica semper ta seguridad y cumpli cu tur norma di aviacion internacional cual cu den e ultimo 32 añanan semper a cumpli cu ne. Durante un prueba tabata tin un indicacion di un variacion leve y mesora acion a wordo tuma pa asina tuma tur precaucion necesario. E consequencia di esaki ta cu algun vuelo a wordo recomenda pa fuel na Curacao y tambe na Boneiro. Cu esaki nos di FMSA ta declara cu no tin contaminacion den Jet Fuel. E operacion completo di FMSA a traha diligentemente hunto cu inspectornan independiente pa haci test riba tur e tankinan di aeropuerto, Citgo y distribucion, pa confirma cu FMSA su Jet Fuel ta cumpli cu tur e normanan internacional di aviacion. Mester remarca cu FMSA a manda un comunicado di anuncio na tur aeroliña informando cu lo continua cu operacion normal. Nos mision y balor ta pa opera den un manera sigur y confiabel, cu ta inclui control di calidad.