Diaranson 25 di october ultimo, AZV y sindicato FTA a firma un CAO nobo, esta e contracto colectivo valido pa e periodo di 2017 te 2020. Despues di algun luna di negociacion, unda tabata tin
‘aki aya’ algun diferencia di opinion pero nada di gran impacto, tanto gerente di AZV como FTA ta satisfecho cu e contracto colectivo a wordo firma.
Di ocho CAO
E contracto colectivo aki ta e di 8 realisa desde inicio di AZV te cu awe. Na inicio di AZV a traha cu un ‘Algemene Overeenkomst’cual despues a negocia y a yega na e prome CAO oficial pa e periodo di 2004- 2007. Siguientemente diferente delegado a negocia CAO 2007- 2009, CAO 2010- 2011, CAO 2011 – 2012, CAO 2012 – 2013, CAO 2013 – 2014, CAO 2014 – 2017 y e mas recien, esta e CAO 2017 – 2020. E miembresia di FTA tambe a crece, unda na comienso di AZV tabata tin 18 trahado afilia na FTA, awendia tin 54 trahado afilia na FTA di e total di 84 trahado den servicio fiho di AZV.
Posicion AZV
Segun gerencia di AZV, por mira riba un trayectorio fructifero entre partidonan. Pa hopi aña FTA exitosamente a representa e trahadonan di AZV. Hunto a sali for di e punto di bista cu e tarea di e trahadonan di AZV ta di igual importancia cu por ehempel cualkier otro dunado di cuido medico na Aruba. Cu firmamento di e CAO nobo aki, tanto AZV como FTA ta sigui garantisa e paz laboral dentro di AZV.
Riba e imagennan por mira (di robes pa drechi), Señor Giovanni Sapuana (delegado di
FTA), señor Tyrone Bremo (vice- presidente di FTA), Señor Hubert Dirksz (presidente di
FTA), señor drs. Anco Ringeling (director di AZV) y Señor Elgar Gomes (delegado di FTA).