Diabierna tabata un dia importante pa FTA y trahadonan di Aruba Beach Club, caminda cu a firma un CAO cual ta valido di 1 November 2017 te cu 31 October 2020. Sr. Hubert Dirksz ta amplia.
Na e momentonan aki ta importante pa tanto e trahadonan cu ta trahando den e industria mas importante pa pais Aruba y tambe pa esunnan cu ta dirigi e hotel aki, cu ta mantene e calidad cu tanto nos como local y tambe e turistanan cu ta bishita, den caso aki cliente di Aruba Beach Club.
E negocacion a bay den un bon ambiente, y FTA a logra algo hopi importante pa Aruba pa varios aña caba, ta cerando acuerdonan caminda ta move di 6 dia di trabao pa 5 dia di trabao. Esaki ta un logro ya cu e trahado tin mas tempo pa famia cu e por descansa y esaki por nifica tambe un aumento di productividad. Y sigur nan momento cu bo ta mantene bo salario, trahando menos ora esey tin impacto ariba tur beneficio y tur beneficio cu e trahado tin ta aumenta den caso di salario pa ora y e tin efecto ariba su vakantie, su bonus etc.
Sr. Dirksz a sigui bisa cu e proceso aki ta uno cu si nan kier mantene e productividad halto, nan kier proteha nan producto turistico, mester inverti den e capital humano. Den nos hendenan cu ta percura pa e felicidad y trankilidad, e bon servicio cu e turistanan merece.
FTA ta gradici gerencia tambe e directiva di Aruba Beach Club, Sra. Faridi Mansur y e shopsteward cu a coopera pa a haya un CAO den un tempo relativamente corto. A haci esaki prome cu tempo, sin cu mester bay bek den retroactivo. Ta cuminsa un temporada nobo cu beneficionan nobo y tambe tin aumento den beneficionan chikito y tur esakinan hunto ta mustra un adelanto.
Na Aruba Beach Club no ta papia di maximo ya cu ley no ta papia di maximo pero di minimo, pa mantene e compania draai den bon ambiente mester tin un adelanto chikito ya cu esaki ta garantisa continuidad, segun Sr. Hubert Dirksz.