Siman pasa diahuebs, FTA tabata tin un reunion cu minister, hunto cu dos otro dos sindicato cu tabata cu FTA tres pa cuater aña pasa, tocante e tarifa social di Serlimar. Sr. Rudy Geerman, di sindicato FTA ta amplia mas.
Den e reunion aki, y esaki ya caba ta di tres reunion cu a tuma luga caba cu e minister aki. FTA y e otro sindicatonan a entrega nan proposicion. FTA ta contento cu Serlimar ta bayendo den e tarifa social. Esaki kiermen cu esun cu ta gana mas, lo mester gana un poco mas.
Pa esaki lo tuma luga un reunion diaranson atardi 1.30 na sede di FTA pa studia e proposicion y diahuebs, 10 or di mainta e reunion cu e minister lo continua. Esaki kiermen cu ta bayendo den bon direccion, ya cu FTA tin e cantidad di hendenan cu ta cobra onderstand, cu ta cobra pension pa separanan di otro. Tambe esunnan cu ta cobra minimumloon. FTA ta di opinion cu no por laga tur hende paga e mesun cos.
Sr. Geerman ta sigui bisa cu nan lo entrega nan proposicion na minister diahuebs y nan ta spera cu den un reunion mas, nan por keda cla cu esaki y anuncia e pueblo ki areglo a yega pa locual ta pago pa recogemento di sushi. Tur ta consciente, manera a bisa semper, caminda cu e cantidad di sushi cu cada cas, cada persona ta produci, ta birando di mas. Tur hende ta dispuesto pa paga un suma, pero no tur hende por paga un suma igual, ya cu no ta tur hende tin e mesun salario.
Tarifa social ta nifica cu esunnan cu ta gana mas, automaticamente nan ta susha mas hopi. Esey ta nifica cu lo bin un tarifa social den e caso aki.
Locual cu si a bin, pero cu mas despues FTA lo bay mas den detayes cun’e, ta nifica cu e lo wordo cobra via di belasting. Consecuentemente, tur hende lo wordo paga, sea cu bo ta tuma e servicio of no. PEro bo mester pag’e. Esey ta un punto cu a bin dilanti y e ta acumula. Cu esaki, Sr. Geerman kiermen cu si bo ta biba dos hende den cas y tur dos ta trahando, contal cu bo no cay den e suma cu ta wordo despensa, cu no ta paga. Pero si bo ta trahando y ganando ariba minimumloon, e ora bo mester paga. E pago ta wordo haci pa cas. Pero diaranson, FTA lo studia e proposicion y bay cu esaki pa e minister.
Encuanto e cobramento pa recoge sushi, e pregunta ta ken ta cobr’e pa gobierno, a pesar di cu e ley t’ey caba. WEB, Elmar, Setar niun no kier a haci’e. Esey ta e problema, con ta bay cobr’e. Ta sinti cu gobierno lo no kier pa e ta habri, lagando e pa e ciudadano mes pag’e, y esaki ta trece cun;e, cu e ciudadano lo no haci’e. Nan a yega na un acuerdo cu Finansas. E lo bay den e caso aki, e lo wordo cobra pa aña door di Belastingdienst. E ta wordo cobra pa tur hende. Esey ta e opcion cu na e momentonan aki, gobierno tin ariba mesa.
E ta bay ta individual, depende di e salario cu e ciudadano ta gana. Esun cu ta gana mas, ta paga mas. Esey kisas por wordo haya discriminatorio. Pero un tarifa social ta asina cu esun cu ta gana menos, ta paga menos. Y esun cu ta gana mas, ta paga mas. Mescos cu AZV, ta un porcentahe e ta, unda cu menos bo gana, menos bo ta paga.
Pero aki ta un solo tarifa, un solo suma tin, pa e bracket cu ta papiando di dje. Na e momentonan aki, ta mucho prematuro pa bay ariba e bracketnan. Pero ora cu yega na e consenso hunto cu gobierno, e ora lo duna un splicacion mas amplio.
Por ultimo, Sr. Geerman a bisa cu ta yega un momento cu tur hende mester paga, pero no por ta asina cu esun cu ta paga hopi, ta paga mesun suma cu ami cu ta gana poco.