Arbowet ta un tema cu tin hopi aña papiando riba dje. Pa vicepresidente di FTA Hose Figaroa, kende tin 20 aña caba como Abogado, ta algo cu el a scucha for di tempo cu el a drenta. Y pa awo ta preocupa cu no ta scuchando con su preparacion pa introduccion ta avansando.
E ta consciente, el a bisa, cu e ta un tema complica mirando cu Arbowet no ta un ley riba su mes, pero cu tin di haber cu practicamente tur otro ley cu tin di haber cu labor. E ta pone cierto obligacion riba e duna di trabou pa cambionan cu mester tuma luga riba condicionnan pa e trahadonan.
A haya un concepto si caba mas o menos dos aña pasa den un dialogo Tripartite. “E ta un ley importante pasobra e tin hopi di haber cu e condicionnan na trabou, salud y siguridad. E ta un proteccion di e trahado, pero lamentablemente nos no a tende mucho mas di esaki. Nos ta spera cu e proceso aki lo no bay para.”
E ta algo cu nan ta consciente lo a tuma algun luna ora cu a papia riba dje dos aña pasa despues di e consulta, pero awo FTA ta un tiki preocupa cu no a haya un reaccion cu e ta avansando.