Cheap labour ta un fenomeno cu Aruba tambe conoce. Y esaki tin di haber cu contractacion di personanan cu no tin permiso. E personanan aki ta acepta cualkier pago, y sindicato no por haci mucho den casonan asina. Solamente por haci denuncia pa tipo di controlnan aki tuma luga.
Presidente di FTA mr. Hose Figaroa a splica cu cheap labour ta afecta e mercado, specialmente e salarionan den forma negativo, pasobra tin cierto dunadonan di trabou enbes di paga loke ta e salario legal ta busca e hendenan cu nan ta paga menos.
Un otro preocupacion di e sindicato y cu a bini dilanti tambe den e congreso tumando luga, ta e forma di contractacion. Aki na Aruba, el a conta, tin hotelnan unda cu mas cu 50% di nan personal no ta den servicio directo di e hotel. Pues un compania ta haya un contracto for di un hotel pa brinda cierto servicio y e compania ey ta busca hendenan pa haci e trabou. Si mester surgi problema, no por haci ningun demanda contra e hotel. Esaki ta algo cu mester regula den un ey y cu FTA lo bay atende cu Gobernantenan tambe.