E parti di e salanan di operacion lo trece un retraso pa loke ta e proyecto di hospital. Sinembargo lo enfoca pa cumpli cu tur cos manera proponi, segun Frendsel Giel, director di Aruba Investment Bank, kende a splica.
E proyecto di salanan di operacion lo causa algun retraso cu siguramente mester wak con ta haal esakinan in. Pero finalmente ta spera di entrega e proyecto aki den su totalidad, inclui e renobacion di e edificio pa rond di October 2018. Ya otro aña caba ta spera pa entrega e nieuw bouw, cual ta e edificio di seis piso nobo.
Como cu AIB Bank ta maneha SOGA, nan ta traha bao di mandato di un bestuur. E ta sigui splica cu a caba di termina e proceso di diseño cual ta tras di lomba. Awor aki ta bezig ta elabora riba e inversion cu lo mester wordo haci. Pero e ta wordo integra den e proyecto pero finalmente ta forma parti di e proyecto total y dentro di poco por anuncia e comienso di construccion di esey. Hunto cu esey, e trabao actual ta avansando den pasonan necesario. Pa integra un proyecto asina, tin cu stop un parti pa por integra na un manera cu no tin un kapitaal vernietiging substancialmente.
E salanan di operacion ta riba un diseño nobo. Awor aki ta bezig ta calcula esaki pa loke ta fondo, pero e ta keda den e ramo di inversion cu a premira anteriormente.
Giel a sigui splica cu originalmente mester a haci cambio di e sala di operacion actual. Gradualmente ta haci un cambio den e diseño mes y renoba nan. Awor aki a pone den un piso banda di dje. A haya un espacio cu por traha e salanan totalmente nobo, mientras cu e otro ta sigui funcional. Pronto, lo por sa cuanto e costonan ta. Ta spera cu por bin mas frecuente pa duna un update importante pa transparencia pa tin informacion al dia y duna comunidad informacion mientras cu e proyecto ta progresando. Ta spera cu dentro di poco, kisas pa e proyecto mes por tene un openhouse, pa asina demostra e construccion cu ta avansando. Tin cu cuadra esaki cu e contratista mirando cu nan tin siguridad masha halto mes, e ora tin cu pidi un cita delanta pa e luga cu ta wordo construi na dje, segun Giel.