Cochachamba, BOLIVIA – Un cacho schnauzer di seis luna, cu ta uza un habito color bruin y ta pose trankilamente pa e camara, a bira un celebridad riba internet despues cu su potretnan a wordo publica riba Facebook pa e Proyecto Narices Frias, un organisacion cu a promove e adopcion di animal na Cochabamba, Bolivia.
Fray Carmelo, manera cu e cacho yama, tabata un regalo di e fielnan na e pastooran di e convento Franciscano na Cochabamba, segun un trahado di e luga a bisa CNN en Español, kende no kier a wordo identifica.
E animal a yega cuater luna pasa na e convento y e idea di su paña a surgi di fray Jorge Fernandez, uno di e pastoornan di e convento, kende a bisa na un medio local cu el a tuma e habito di un di e popchinan cu nan a uza pa anima e muchanan y a bisti e cacho.
E historia a wordo ampliamente difundi pa varios medio local, tanto asina cu Frai Bigoton, manera cu tambe e ta conoci, a bira un streya local.
E Proyecto Narices Frias, a resalta e actitud di e convento aki pa adopta e cacho, pues nan ta bisa cu ta un ehempel pa sigui pa e bienestad di hopi animal.
“Si tur e iglesianan di nos pais adopta tan solo un cacho y cuid’e manera Fray Bigoton, nos ta sigur cu e filigresnan lo sigui nan ehempel,” e Proyecto Narices Frias a skirbi riba nan pagina di Facebook.
E potret di e cachonan a ricibi miles di likes riba e pagina di Facebook y te na e momento el a wordo comparti mas di 38 mil biaha den un solo siman.
Fuente: CNN en Español