Gobierno di Aruba a avisa cu Green Corridor lo pasa dilanti Isla di Oro y lo ta perfecto pa ta forma parti di dje, cu e proyecto di hotel. A haci algun tekening cu a wordo presenta na DOW, caminda cu Isla di Oro tabata un plaza intermedio caminda cu turistanan por a yega. Tabata tin luganan pa refresca. E desaroyadornan tabata kier pa Isla di Oro ta un luga comodo pa e turistanan y pa e localnan haci di e plaza un parada comodo.
Franz Sydow, representante di Zoetry Isla di Oro, a sigui splica cu ta spera cu Gobierno caba mas pronto posibel y pa nan duna luz berde. Ora cu nan haya esaki, nan lo ta cla pa cuminsa pa introduci e permisonan final na DOW y DIP, cu tur su exigencianan. Sydow a splica cu kier traha cu tur e normativanan cu ta existi. Una bes otorga, dentro di 2 aña, tin cu haci’e den un proceso lento, mirando cu ta algo cu ta wordo haci riba awa. Tin cu haci’e cu hopi cuidao. Tin cu forma un board di ambientalista cu ta compaña e desaroyadornan den e proceso di construccion y pa cumpli cu tur rekerimentonan pa e por wordo haci.
Ya caba nan tabata tin varios reunion cu Gobierno, cu e NGOnan y tambe instancianan priva. Recientemente a reuni cu ATIA, unda cu nan a mustra nan apoyo na e proyecto. AHATA tambe a mustra nan apoyo pa e proyecto. Tabata tin reunion cu Parlamento, cu e comision di turismo, unda nan tambe a mustra nan apoyo y tabata hopi agradabel cu Gobierno y Oposicion tabata presente y a mustra nan apoyo.
E desaroyadornan ta trahando cu hopi transparencia y claridad. A haci townhall meetings cu e hendenan di Pos Chikito, cu kier e proyecto y kier pa e ta un realidad pa embeyece e area y recupera Isla di Oro y haci’e bunita bek.
Tambe kier sigui reuni cu tur e institucionnan cu kier apoya e proyecto y tin algun preocupacion of tin algun duda cu por fabor tuma contacto cu nan y nan cu gusto lo duna tur e informacion aki. Esey Sydow tabata bon cla cu nan kier ta hopi honesto y hopi transparente.