Asina cu Gobierno sinta, nan mester reuni cu tur gremio comercial, despues di haci un inventarisacion di e situacion di Aruba. E ta importante pa mira con pa accelera e procesonan pa Aruba bira mas atractivo pa inversionistanan. Esaki ta loke cu Frans Ponson, di Comerciantenan Uni di Aruba, a bisa den un entrevista.
Ponson a papia di diferente tema durante entrevista haci den cuadro di eleccion Parlamentario. Un di nan ta debe di un país. “Ta normal cu un pais tin debe. Pero e topico di ultimo añanan ta cu e debe di Aruba ta sigui crece. E debenan a bay for di control y combina cu pandemia mester a haci un debe grandi cu Hulanda. E debe ta un topico serio y nos ta spera cu cualkier gobierno cu bini lo tuma e asunto aki tambe na serio.”
Pa hopi aña a scucha e papiamento riba bahamento di debe, pero ningun gobierno a yega na mishi cu e tema. A yega momento pa bay traha seriamente riba e tema aki. Pa cuminsa, segun Ponson, Gobierno mester sali y pone un maximo di e aparato gubernamental. Mester haci un analisis di cuanto empleado mester ta publico. “Gobierno mester sali bisa tanto ambtenaar e aparato por tin. Despues analisa cada departamento riba nan necesidad.” Por resulta cu tin departamento tin di mas of of di menos. Pero tur e informacionnan aki mester ta publico.
Gobierno mester ta mas transparente cu tur nan informacionnan, di kico nan ta haci, cuanto hende nan a tuma na trabou y pakico. Con grandi e aparato gubernamental tin mester ta informacion publico.
Banda di e asunto di finanza publico, diversificacionb di economia ta masha importante. Pa esaki mester percura pa trece inversionistanan nobo pa Aruba, drecha e leynan fiscal, haci analisis di regulacionnan di Banco Central, etc. “E no por ta un traba pa un inversionista habri un cuenta bancario na Aruba. Regulacion ta bon, pero e no mester stroba inversionistanan pa inverti na Aruba,” Ponson a bisa ta cosnan cu nan kier discuti cu e gobierno nobo.
Pa logra tur ariba menciona, ta esencial cu gobierno por lo menos dos biaha pa aña sinta cu gremionan comercial. E ta importante pa kita tur redtape den procesonan gubernamental cu aworaki ta un obstaculo pa inversionistanan. Ta imposibel cu un permiso ta dura un pa dos aña prome cu logra haya esaki den man.
Nan mes como Comerciantenan Uni di Aruba tin hopi di e experiencianan menos bon cu den algun minuut por señala esakinan na Gobierno. “Mester sinta pa hunto drecha e economia di Aruba. Gremionan no ta contra economia di Aruba,” Ponson a bisa.
E organisacion ta enfatisa cu hunto mester traha pa e pais. Pa hopi tempo caba a papia di digitalisacion y nunca a haci. Awo cu e pandemia, diripiente cierto procesonan por a wordo digitalisa hopi lihe. “Di con awo si tabata por,” el a puntra. Den henter e proceso aki comerciantenan por duna nan contribucion. Cada obstaculo ta stroba economia, y stroba creacion di cuponan di trabou.
E no kier a duna un comentario specifico riba e refineria, pasobra nan ta comerciante. Pero den comercio tin diferente otro oportunidad, pero pa esaki mester drecha e leynan fiscal. Un di e opcionnan ta exportacion pero e mester ta atractivo pa e inversionista bay den e direccion ey. Por trece mas fabrica Aruba, den cooperacion cu Hulanda. “Cu Reforma fiscal, por trece otro pilarnan economiconan pa Aruba. Mi no ta duda den esaki.”