Diamars ultimo ya caba e federacion di Tennis di Mesa a inicia cu e celebracion di e Copa Betico Croes 2017 esaki den e categoria Masters unda cu e veterano hungador di ping pong, Franklin Lopes a bira e ganador. Mester bisa despues di bon bataya Franklin Lopes y Wingchow Leong a hunga e gran final caminda Franklin a resulta triunfador di e torneo Copa Betico Croes edicion 2017.
E resultado final ta como lo siguiente den Masters: 1. Franklin Lopes 2. Wingchow Leong y 3. Alfred Leong. E Copa Betico Croes 2017 lo continua diamars 24 januari den tur categoria esaki infantil, hubenil, A klas, B klas y Open esaki cuminsando di 5pm te cu 10pm. E entrega di premio lo sigui despues di e final di e torneo.
Den su tempo, sr. Betico Croes den felis memoria a practica e deporte di tennis di mesa, hasta den su temporada como studiante na Hulanda. Un bes bek na Aruba, Betico Croes a continua cu e deporte di tennis di mesa na Club Estrella. E deporte di tennis di mesa a conoce un gran temporada 2016 unda a hunga varios torneo local como tambe internacional. Den e torneo Dutch Caribbean Championship, nos atletanan di tennis di mesa a sa na triunfa logrando tur e prome puestonan disponibel, un muestra cu e atletanan y e deporte ta bayendo den bon direccion.
Un danki sigur na Lotto, e Loteria di Aruba pa medio di Comision di Subsidio cu a subsidia e eventonan deportivo en conexion cu e celebracion riba Dia di Betico. Tur aña mayoria federacion tin riba nan calendario un evento deportivo rond di e fecha di 25 di januari, celebrando asina e fecha natal di e gran estadistica Arubano.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
.