John Franklin Bisslik awendia ta General Manager di e operacion di Jet Blue na Aruba. Diaranson mainta el a ricibi un bishita di sorpresa di e director di Aruba Airport Authority y di e ekipo di e unidad comercial di nos aeropuerto, pa felicit’e cu su 50 añanan trahando na aeropuerto y den e industria di aviacion. Poco hende tin tanto aña asina den e funcion ainda aki na Aruba!
E trayectorio di Frank Bisslik a inicia na November 1966, ora cu apenas el a caba scol y no tabatin e posibilidad pa por a sigui studia pa Hulanda. El a busca trabou y asina a cuminsa su carera cu e aerolinea ALM. Algun aña despues di a funciona como “passenger handling”, e gerente di e tempo ey, Rocky Ponson q.e.p.d, a yam’e cu un oferta pa bay sigui studia 2 aña mas pa “dispatcher” na KLM na Hulanda. Un total di 8 trahado di ALM a sigui e curso e tempo ey.
Frank Bisslik ta corda ainda cu e tabata hoben ora el a completa e estudio y a probecha pa gana mas experiencia internacional, a bay traha na Zurich. Despues el a sigui pa Lebanon, pa London y regresa Zurich.
“Un dia mi tabata na Zurich, defunto Tawa Irausquin tabata di transito y tabata masha orguyoso di mira su empleado awo como Manager. El a ofrece pa bay staciona na Corsou, locual mi a acepta mesora, aunke lo tabata pa 2 luna so. Na final mi a keda 10 aña, te cu mi a casa y a biba bon tempo ey”, asina Frank Bisslik ta corda ainda.
Despues di 20 aña na ALM, na aña 1986 ora Aruba a separa di Antias y a lanta Air Aruba, atrobe Frank Bisslik a hunga un rol importante como fundado di e compania, hunto cu Tawa Irausquin y Baas Versteeg. Eynan el a traha 15 aña largo, como “crew scheduling”, “system operations” y varios otro funcion mas, te cu aña 2000 ora e aerolinea a cera.
Mesora a sigui su carera cu American Trans Air y un compania Mexicano yama Alegro, den forma parttime durante 6 aña largo.
“Mi ta corda ainda, un dushi dia, mi tabata keiro riba lama na Europa riba un crucero, ora un hefe di American Trans Air a yama pa bisa mi cu ora mi regresa mi no tin trabou mas pasobra e compania a cera na Aruba”, e ta corda. Asina el a tende tambe cu Jet Blue ta biniendo Aruba, pa cual el a tuma contacto cu nan y a ofrece nan su ayudo y sosten. Mesora nan a tum’e y for di 2006 te cu awor e ta maneha e aerolinea na Aruba, awor pa 10 aña caba.
Frank Bisslik ta corda cu den su 50 añanan, el a mira e aeropuerto bieu, esun nobo, e renobacion na aña 2000 y e crecemento grandi cu aviacion a conoce riba nos isla. “Mi kier djis bisa cu si mi mester muri y nace atrobe, lo mi bolbe traha den e industria di aviacion”.
Durante un ceremonia cortico, director di Aruba Airport Authority N.V., James Fazio, hunto cu gerente di e unidad comercial di aeropuerto, esta Barbara Brown y e ekipo di mercadeo di aviacion a bishita
Frank Bisslik pa entreg’e un recuerdo pa e 50 miho añanan di su bida cu el a entrega na e industria di aviacion. Tambe e ekipo di Jet Blue Aruba tabata masha orguyoso di nan hefe y a dorna su oficina masha bunita pa e ocasion special aki.