CIUDAD DI VATICANO, Vaticano – Papa Francisco a anuncia diahuebs, cu e lo canonisa dia 13 di Mei dos di e tres muchanan di Fatima (Portugal) cu a sigura di a presencia aparicionnan di La Birgen na 1917, un “milager” reconoci pa Iglesia Catolica.
E canonisacion di Jacinta y di Francisco Marto lo marca e centenario di e “aparicion” aki.
Francisco lo biaha dia 12 y 13 di Mei pa Fatima pa e ceremonia di canonisacion, e papa a indica den un consistorio, un reunion di e cardinalnan.
Papa a aproba na Maart un decreto di e Congregacion pa e Causa di e Santonan “relativo na milager atribui na e intercesion di e beato Francisco Marto, naci dia 11 di Juni y a muri dia 4 di April, di 1919 y di e beata Jacinta Marto, naci dia 11 di Maart di 1910 y fayeci dia 20 di April, 1920.
Dia 13 di Mei, catoliconan ta celebra e prome aparicion na 1917 di e Virgen na e tres muchanan pastor (Jacinta, Francisco y Lucia) den e localidad di Fatima, mas of menos 100 kilometer di Lisboa, e capital.
Segun e creencia, la Birgen a aparece otro cinco biaha a lo largo di 1917 y durante e aparicionnan aki a realisa varios profecia, recomendacion y a entrega tres mensahe conoci como “e tres secretonan di Fatima.”
Soeur Lucia, e unico cu a sobrevivi di e tres muchanan y cu a muri na 2005, poco luna prome cu Juan Pablo II, a revela decadanan atras, e dos prome secretonan. Den e prome e tabata duna un vision di fierno y den e di dos tabata papia di un guera pio cu tabata tin e tempo ey.
E di tres misterio a keda manteni den secreto durante hopi aña y solamente a wordo revela na 2000, precisamente na Fatima.
Segun Vaticano, a referi na e atentado cu Juan Pablo II a sufri dia 13 di Mei 1981 riba plaza San Pedro, den e di 64 aniversario di e prome aparicion di Fatima y na e lucha entre comunismo ateo y Iglesia den siglo XX.
Fuente: El Espectador