PARIS, Francia – E prome minister Frances a emiti un advertencia severo na e pais diadomingo: Francia ta sigui ta un obhetivo pa terorismo y e pais lo bay sufri atakenan nobo.
“E menasa ta maximo,” Manuel Valls a bisa den un entrevista cu e emisora di radio Europe 1. “Nos a wak’e di nobo den e ultimo dianan, e ultimo oranan, y hasta mientras nos ta papia. Cada dia inteligencia, polis y servicionan di gendarmeria ta frustra posibel atake y ta desmantela rednan di Irak y Siria.”
Valls a bisa cu autoridadnan tabat monitoreando rond di 15 mil persona na Francia y ta kere cu nan tabata den e proceso di radicalisacion. Anteriormente, autoridadnan Frances a bisa cu lo tabata 10 mil persona riba su lista di “fiche S,” uza pa individuonan radicalisa considera un menasa pa siguridad nacional.
“Nos tin casi 700 Yihadista – residentenan na Francia of Francesnan – cu ta combati na Irak y Siria,” Valls a splica.
E advertencia di e prome minister ta sigui e plan di ISIS frustra siman pasa di ataca e catedral di Notre Dame na Paris.
Diasabra, autoridadnan Frances a acusa un muhe, cual nomber a wordo duna como Ornella G., relaciona cu e actividadnan aki. El a wordo acusa di “asociacion ilicito terorista pa comete delito contra personanan” y “intento di asesinato como banda organisa den relacion cu un grupo terorista,” segun oficina di fiscal di Paris.
Ornella G. y otro tres muhenan a wordo deteni depses cu nan a haya un auto cu cinco cilinder di gas bandona cerca di e catedral, un gran atraccion turistica den centro di Paris.
Fiscal di Paris, Francois Molins, a bisa diabierna cu e muhenan tabata forma parti di un celula dirigi pa ISIS desde Siria. Un di e muhenan tabata tin un carta den su tas hurando lealtad na ISIS, Molins a bisa. Otro tabata comprometi cu dos terorista conoci. Francia tabata bao di estado di emergencia desde cu e atakenan terorista di Paris a tuma luga na November.
Fuente: De Telegraaf/CNN en Español