Nos por a tuma nota di e tantisimo casonan di abuso di mucha y ta actonan cu fraccion di MEP ta condena. E ta un tema cu nos no kier haci politica cu ne, pero nos kier enfoca riba e proceso cu mester fortifica pa por yuda mitiga e desaroyo negativo aki.
Na 2010 fraccion di MEP a entrega un ley di iniciativa pa introduci castigonan minimo. Sinembargo tabata tin hopi critica di diferente instancia cu e concepto aki.
Ta importante pa menciona cu colega Sue Anne Ras a traha duro pa introduci meldcode, esaki ta un paso den un bon direccion. E meldcode lo bin na vigor juni venidero. Mester fortifica ful e cadena hudicial y social. Pesey e social crisis plan ta hopi importante pa logra esaki. Ta di condena e cierto medianan cu ta critica e social crisis plan, si bo ta critica ta paso no no a compronde e contenido. No a introduci e social crisis plan pa enfoca riba 1 solo dilema specifico sino pa fortifica e cadena social y te hasta e cadena hudicial. Ta importante pa bin inversionnan grandi pa cu e cadena hudicial, paso pa huez logra duna un castigo e investigacion mester tuma lugar debidamente. Mester simplifica e procesonan tambe pa haci’e mas facil pa personanan haci nan denuncia.
Mester cambia e klachtdelict pa un denuncia cu ta haci investigacion. Cu sin un denuncia mes por cuminsa haci investigacion pa wak kico a sosode di berdad. Por ehempel na Hulanda tin un organo cu expertonan medico, hudicial, psicologo y psychiater cu nan tambe por yuda cu nan expertisio na momento di dicta sentencia.
Despues cu un persona a comete un delito ta importante pa e haya e tratamento necesario den KIA pa despues cu nan bay bek den sociedad e chens ta minimo cu nan lo bolbe comete un delito. Un accion holistico tanto preventivo, e parti di investigacion y introduccion di leynan pa aumenta e castigonan.
Jeugd en Zeden politie no tin suficiente personal pa verhoor e victimanan. Mester aloca e fondo pa ekipa Jeugd en Zeden Politie cu e material necesario. Otro aspecto importante ta e recherche asistent pa e peso administrativo pisa cu e casonan tin pesey e casonan ta tarda largo prome cu entrega nan na Ministerio Publico.
Nos lo urgi gobierno pa analisa e structura di e organisacionnan. A bira tempo pa Jeugd en Zeden Politie tin su mesun psicologo y gedragskdeskundige vast den servicio na momento cu un caso presenta bo tin tur e profesionalnan na pia di trabou.