“E violacion di ley y e agresion contra di polis den un nightclub den zona di turismo na Palm Beach diasabra marduga ta totalmente inaceptabel! Fraccion di AVP ta exigi pa tur doño y manehador di nightclub, restaurant, supermercado, tienda, hotel, etc. cumpli cu ley of carga e consecuencia y e peso completo di ley. Mescos ta conta pa tur ciudadano di nos pais. Pa loke ta trata e caso di diasabra anochi, fraccion di AVP ta urgi minister di Husticia pa laga aplica tur e sancionnan cu ley ta prescribi pa e violacion di e permiso pa opera e nightclub despues di oranan stipula, pa aplica e boetnan cu ley ta prescribi, pa husticia persigui esnan cu a agredi polis den ehecucion di nan trabou y pa evalua e posibilidad pa condiciona e permiso di e compania pa opera un nightclub na cumplimento estricto cu ley.” Esaki tabata e prome reaccion di e fraccion di AVP riba loke a sosode diasabra anochi den e nightclub “297” na Palm Beach. E indignacion cerca e fraccion pa loke a sosode ta grandi!
VIOLACION DI LEY
E violacion di leynan di nos pais ta inaceptabel segun e fraccion di AVP. “Leynan di nos pais ta conta pa tur hende, tur caminda y tur ora! No tin excepcion! Niun hende of compania por kere cu nan por viola ley y scapa. Pesey nos ta exigi cumplimento cu ley completo y sin niun excepcion.” Segun e informacion cu a sali den prensa riba e caso di diasabra anochi, lo tin diferente ley cu probabelmente a wordo viola. E fraccion di AVP ta duna di conoce cu a base di e informacion cu a sali den medionan di comunicacion, lo a viola e orario di e permiso pa opera e nightclub, a nenga pa sigui orden di polis, a stroba y agredi e polisnan den ehecucion di nan funcion y posibelmente a opera un nightclub cu no ta di a acuerdo cu e permiso. E fraccion di AVP ta spera di haya e raport oficial di polis pa e ora saca su conclusion definitivo. Pero cualkier sea e violacionnan di leynan cu sali den e raport, fraccion di AVP ta urgi minister pa aplica full forsa di ley! Fraccion di AVP: “Nos kier pa compania y individuonan inverti den nos pais, den turismo of cualkier otro area. Nos kier un economia vibrante y un turismo atractivo cu un variacion di actividad. Pero esey ta trece cu ne cu tur inversionista y tur compania mester cumpli cu leynan di nos pais. Inversion no ta duna trato special na niun hende! E leynan ta traha pa nos biba den un forma ordena y pa garantisa siguridad tur caminda y tur ora. Reglanan di permiso pa opera cualkier compania ta traha pa sigura calidad y confiansa den producto y servicionan cu ta duna y pa sigura competencia husto entre companianan. Cualkier violacion di e condicionnan di un permiso pa opera un compania ta nifica cu e compania ta actua contra di e interesnan di nos pais cu ta fiha den ley y den e permisonan. Esey ta nifica cu tur e sancionnan mara na e permiso ta aplicabel mes ora! Sin excepcion nos ta urgi e minister pa no laga niun duda cu na Aruba tur hende y tur compania mester cumpli cu ley of carga consecuencianan di e violacion di ley.” Fraccion di AVP ta sigui e caso aki y tur otro asunto na nos pais di cerca pa sigura cumplimento estricto cu leynan di nos pais. “Tur actividad den nos pais ta basa riba leynan specifico y ley di orden publico. Esey ta pasobra nos ta y kier keda un pais ordena y sigur. Nos kier ten’e asina tambe.”