E siman e Stichting Fractiemedewerker di AVP a cumpli cu nan deber di entrega cuenta anual 2017 Presidente di Parlamento mr. Ady Thijsen.
E entrega a wordo haci door di drs. Mervin Wyatt Ras, kende ta Presidente di e Stichting. Den e cuenta anual ta duna un relato di tur e subsidio cu e Stichting aki ta ricibi for di Parlamento, pa por contracta fractiemedewerker cu ta yuda nan den nan trabou diario. Den e relato aki mester duna detaye di tur loke a haci cu e placa te na e ultimo cen.
E suma aki ta wordo uza door di e fraccion pa contracta personanan cu ta duna un man den nan trabou diario pero tambe cu experticio por ehempel ora di traha mocionnan. E ta un suma cu tur fraccion den Parlamento ta ricibi. “Como cu ta trata di un subsidio,nos ta haya cu nos mester cumpli cu nos responsabilidad di duna cuenta di kico a wordo haci cu e placa y esaki nos a bin ta haciendo desde cu ta haya e subsidio aki,” drs. Wyatt Ras a splica.
Fractiemedewerker no ta algo cu a wordo inventa na Aruba y tur pais cu tin Parlamento tin esaki. Na Hulanda por ehempel cada Parlamentario tin diferente colaborador pa yuda nan haci nan administracion, traha riba cambionan di ley y na Corsou tambe e t’asina. Na Aruba e ta diferente, esta cada Parlamentario no tin un hende pero tin colaboradornan pa henter e fraccion. Si t’asina cu ta trahando pa amplia esaki, mirando cu tin varios ley pa traha riba dje, y concepto cu mester duna “feed back” den cual ta importante pa tin professional pa yuda nan den esaki. Di e forma aki e calidad di Parlamento lo subi tambe.
E Presidente di SFM a wordo compania pa Secretario y Tesorero, Robert Candelaria y Richard Arends.

Comments

comments