FPNM cu 15 dia di Gratitud pa recauda alimentacion pa famia den necesidad

Riba 18 di November 2020, den cuadro cu dia internacional di derecho di mucha, e siman di lantamento di mucha y e temporada di pasco cu ta tan spera, Fundacion Pa Nos Muchanan a presenta nan ‘Christmas Challenge’ cu yama “15 dia di Gratitud.” Un di e derechonan di un mucha proclama pa Nacionnan Uni ta cu cada mucha tin derecho pa tin un cas, paña, alimentacion sano y awa limpi pa bebe. Mirando e situacion actual, esaki a bira un reto pa hopi famia. Famianan ta pasando duro pa asina pone cuminda riba mesa pa nan famia. Pa e motibo aki, Fundacion Pa Nos Muchanan a bin cu e ‘Christmas Challenge’ aki pa recauda alimentacion pa famianan den necesidad.

E challenge ta parti den 15 dia, unda cuminsando for di december 1 te cu december 15 ta hinka un articulo den un caha di gratitud. Ora cu e caha ta yen, ta regala esaki na un famia den necesidad. E intencion ta pa haci esaki na cas hunto cu bo famia.

E idea tras di e nomber “15 dia di gratitud” ta pa no solamente duna na un otro cu no tin, pero tambe pa reflexiona y duna gratitud pa loke abo y bo famia mes tin.

Fundacion Pa Nos Muchanan ta invita comunidad henter pa participa den e ‘Christmas Challenge’ di “15 dia di Gratitud.” Si bo kier participa pero no cononce un famia den necesidad, por tuma contacto cu nos na 583-4247/588-0856 of manda un email na [email protected].

Comments

comments