Caracas, VENEZUELA- Forsanan di siguridad Venezolano a reprimi manifestantenan esmascara cu gasnan lacrimogeno, cañonnan di awa y pepperspray, na Caracas, diamars ultimo. Esaki a sosode despues cu nan a blokia un manifestacion di oposicion contra di e presidente socialista Nicolas Maduro. E enfrentamentonan a cuminsa despues cu autoridadnan a cera e stationan di metro, establece puntonan di control y a cera un plaza unda opositornan a planea nan ultimo protesta contra di e gobierno autocratico y un crisis economico profundo.
Polis a uza pepperspray ariba e hefe di e Asamblea Nacional, Julio Borges, dos biaha candidato presidencial, Henrique Capriles y e activista di derechonan humano Lilian Tintori.
Activistanan di oposicion a bisa cu bandanan pro-gubernamental arma a uni na e pelea y a cuminsa tira.
Riba caya, muhenan na rudiya tabata canta e himno nacional mientras cu bisiñanan di edificionann den vecindario tabata bati e weyanan den un demostracion di e rabia contra di un gobierno cu nan ta culpa pa un recesion profundo cu a conduci cu cuminda a bira schaars.
Cu miles di persona na ambos banda, e simpatisantenan di e presidente di 54 aña a organisa nan propio manifestacion, den un escenario volatil, algo cu ta normal durante e 18 añanna di e gobierno iskierdista den e nacion Suramericano.
Tambe den otro ciudadnan di Venezuela tabata tin manifestacionnan.
Gobierno ta acusa partidonan di oposicion di ta complice di un complot lidera pa Merca pa deroca Maduro, cu a goberna Venezuela desde cu Hugo Chavez a fayece na 2013.
E tensionnan a bay halto den e arena politico di e nacion productor di petroleo despues cu e Corte Supremo di Husticia pro- Maduro siman pasa a anula e funcionnan di Congreso dirigi pa oposicion.
Aunke cu e tribunal a hala bek ariba su decision durante fin di siman, e Asamblea ta sigui di ta impotente debi na sentencianan hudicial anterior.
E instabilidad ta haci cu bononan Venezolano a perde balor, cu e prijs di papel di referencia 2027 a baha te na 4.4%
Presion internacional riba Maduro a aumenta segun e protestanan di oposicion a cuminsa bek siman pasa.
Fuente: www.reuters.com