Awe a vence e fecha cu Gobernador Boekhoudt a duna Formador pa finalisa cu formacion di gobierno nobo. Y awe den oranan di atardi el a entrega reparticion di e carteranan y nomber di esnan sugeri pa bira minister den e gobierno nobo.
Ta trata di en total 8 minister, di cual dos ta di partido RAIZ.
Gobernador di Aruba, Alfonso Boekhoudt riba diabierna 27 di augustus a ricibi e acuerdo di gobernacion firma for di Evelyn Wever-Croes. Durante di e ultimo simannan, sra Wever-Croes den su rol como formador a reuni regularmente cu Gobernador Boekhoudt pa asina duna un relato di e progreso y implementacion di e encargo di formacion.
Aparte di entrega di e acuerdo di gobernacion, tambe formador a informa Gobernador Boekhoudt tocante e reparticion di cartera. Den e gabinete nobo, MEP lo haya seis minister, esta minister di:
- Asunto General, Innovacion, Organisacion Gubernamental, Infrastructura y Planificacion Teritorial, alabes prome-minister
- Finansas y Cultura
- Husticia y Asuntonan Social
- Labor y Integracion
- Salud Publico
- Enseñansa y Deporte
RAIZ ta haya dos minister, esta minister di:
- Asunto Economico, Comunicacion y Desaroyo Sostenibel
- Integridad, Naturalesa, Transporte y Cuido di Grandinan
Finalmente formador a haci entrega na Gobernador tambe di e documentonan den cuadro di screening di e ministernan nobo. Pronto Gobernador lo papia cu formador tocante e resultado di e analisisnan. Despues cu e proceso aki finalisa, lo huramenta e ministernan.