No por laga ningun sospechoso deteni na merced di ningun hende cu no ta un sub fiscal of fiscal di Ministerio Publico pa e asina yama “voorgeleiding”.
Nos codigo di procedimento penal ta bisa cla y raspa cu na momento di un detencion e autoridad responsabel pa e detencion mester hiba e sospechoso de inmediato pa un sub fiscal of fiscal di Ministerio Publico. Esaki no tawata e caso den e detencion di dos ilegal sospecha di a viola nos leynan na Colony den e weekend cu a pasa.
Kico a bay robes?
Despues di a detene dos ilegal mas tambe haya curpanan si bida na costa di Aruba, un reportero a haya cierto privilegionan cu ta viola e norma y balornan di e bon funcionamento di e cuerpo di polis.
E agentenan policial tanto uniforma y tambe bisti cu polo shirt di K9 a haya ta bon di expone e dos personanan aki na un medio di prensa y na su turno e reportero a cuminsa haci preguntanan cu por cierto e no ta autorisa segun nos Codigo Penal di Procedimento ta permiti. Un interogatorio comosifuera cu e reportero ta un sub fiscal of fiscal di Ministerio Publico mientras cu e polisnan ta permiti esaki.
Derecho di privacidad a keda viola y of a duna oportunidad pa a viola e derecho aki:
E agentenan policial y tambe miembronan di K9 ta esnan cu ta keda responsabel pa ken cu nan por detene pa un of otro delito of crimen. No ta importa si ta un legal of ilegal, nan obligacion ta pa salvaguardia e derechonan di cada persona cu ta keda restringi di nan libertad. Ta aki ta unda por mira cu cos a bay robes. E video ta mustra claramente cu e polisnan y e agentenan di K9 a opta pa no stroba e reportero envez di proteha e derecho di privacidad di esnan cu ta keda deteni y ta keda bow di nan responsabilidad.
Orden di Abogado a yega di critica esaki caba:
Algun siman pasa por a tuma nota di un nota fuerte di Orden di Abogado ora cu polis/KPA a opta pa reparti potretnan di ilegalnan deteni. Corectamente e Minister di Husticia a bin padilanti y pidi disculpa den nomber di KPA. Pero ta parce cu cos no a cambia. E fin di siman aki atrobe por mira con miembronan di KPA y K9 ta haci peor. Den e caso aki nan a duna tur privilegio pa un reportero haci preguntanan y grita esnan deteni. Por spera un reaccion un biaha mas di Orden di Abogado den e asunto aki? E contesta ta “Si”. Esaki ta motibo cu e Orden encuestion ta kere cu sin importa ken por ta envolvi cu husticia e ta y ta keda cu su derechonan y ta obligacion di KPA pa sali na vanguardia di esaki na momento cu nan priva un persona di su libertad.
Partimento di placa pa informacion y tips:
Mas aleu nos ta bin siña cu tin partimento di placa na ordo pa esnan den e cuerpo cu ta duna informacion of tips di loke por ta sosodiendo pa asina cierto medio di prensa por haya privilegionan manera eo ta promer na e sitio den caso di un inval di Arrestatie Team. E dilema aki a bira un cancer pa hopi den KPA ya cu nan ta pensa cu un dia cos lo bay robes y hende ta bay salida herida danki na e soflonan barata cu tin den KPA. Varios ta e nombernan cu ta wordo menciona y entre nan tin cu hasta ta ocupa puestonan den departamentonan strategico di KPA.
Maneho actual y solucionan:
Minister di Husticia Mr. Andin Bikker a hereda un dilema for di e ex minister Dowers cu e tempo ey tawata usa fondonan di Bureau Informatie en Preventie pa paga un medio di mercadeo pa yuda dorna su maneho cu parrels en payetten. Ta trata di un suma di alrededor di 125 mil florin. Tawata tin hasta hende di e compania di marketing cu tawata drenta sali di wardanan di polis cu informacionan sin importa si nan ta confidencial of laga. Varios di nan a keda publica y tin cu hasta a perhudica un of mas caso den Corte of den e procedura rekeri pa nos leynan. Esaki sigur tin e Minister di Husticia actual su atencion y ora cu ta asina leu por bai scucha e accionan cu ta bai wordo tuma. Mas aleu cu e instalacion di e Integriteits Kamer pronto lo mira un paro na tur e fandanganan aki den KPA y otro departamentonan gubernamental.