FORD ta corta den 7 mil cupo di trabou na nivel mundial

WASHINGTON, Merca – Grupo Ford dialuna a anuncia cu den e proximo lunanan e lo elimina 7 mil cupo di trabou, 10% di su cuponan di trabou mundial, di cual 2300 lo ta na Merca, pa spaar 600 miyon dollar anual.. E anuncia a wordo duna pa e consehero principal di Ford, Jim Hackett, den un carta manda pa empleadonan den cual e ta hustifica e eliminacion di e cuponan di trabou.
“Pa ta exitoso den nos sector, Hacket a indica, nos mester reduci e buraocracia, empodera e gerentenan, tuma decisionnan mas lihe, concentra den e trabou mas valioso y baha gasto”.
E trahadonan Mericano afecta pa e cuponan di trabou lo cuminsa ricibi nan notificacionnan entrante diamars, y lo sigui traha te cu 24 di mei.
E reestructuraicon lo sigui “na Europa, China, Suramerica y e Grupo di Mercadonan Internacional. Nos ta spera di completa e proceso den e mercadonan aki pa final di augustus”, Hackett a agrega.
E ehecutivo a afirma cu e eliminacion di cuponan di trabou, e multinacional lo “reduci e structura di haci negoshi cu alrededor di 20%”, cual lo spaar 600 miyon dollar pa aña.
E eliminacion di 7 mil puesto di trabou, lo ta posibel door di retironan boluntario y forsoso.
Hackett a asumi e direccion di e compania na mei 2017 pa substitui Mark Fields, principalmente pa mehora e cotizacion di e accionnan riba e mercado di balor.
Presidente di e conseho di administracion y bisanieto di e fundado di e compania, Bill Ford, a hustifica e tempo ey e retiro di Fields, pa e necesidad di e compania di “tin un vision mas claro di futuro” pa tuma “decisionnan mas lihe posibel”.
A pesar di e intentonan di Hackett, e balor di Ford a sigui baha y dialuna, despues di e anuncio di retironan, e compania a perde 0.15% y tabata wordo cotisa na 10,28 dollar. Cinco aña pasa, e balor di Ford tabata di 16,02 dollar.

Comments

comments