Dia 14 di Februari ultimo e fundacion, Fondo Nacional di Garantia pa Vivienda pa cumpli 20 aña di existencia. Riba 15 di Februari na Fort Zoutman hunta di directiva, personal y invitadonan a bin hunto pa celebra e aniversario aki y na mesun momento e Fundacion a lasa su website nobo www.fngvaruba.com. Durante e celebracion aki presidente di hunta di directiva Sr. Elmer Pieters y Sr. Frederick Arends, director di e fundacion a hiba palabra.
Sr. Elmer Pieters a repasa e inicio di e fundacion cu a lanta na aña 1997 y su desaroyo den e ultimo 20 añanan sirbiendo e comunidad di Aruba. Durante e añanan un total di ariba 4100 garantia a ser ortoga na e clientenan pa asina yudanan yega na nan propio hogar. Tambe Sr. Pieters a honra Sr. Frederick Tromp cu a cumpli 20 aña como miembro di e fundacion. Na mesun momento director actual di Fondo Nacional di Garantia pa Vivienda, Sr. Frederick Arends a hiba palabra, na unda e la duna reconocimento na Sra. Dorothy MacJannet pa su 20 aña den servicio. Sr. Arends despues a elabora riba e cambionan den e condicion general di e fundacion cu a drenta na vigor entrante 1 di Januari 2017. Alabes a lansa e website nobo di e fundacion. Un website cu ta mas interactivo cu cliente y institucionnan financierio.