Dialuna dia 3 di December Fundacion Movemento ta Bida a clausura tur su programanan pa aña 2018.
Esaki a tuma luga den Renaissance Convencion Center unda tur e gruponan a bini hunto p’asina celebra e aña exitoso di nos Fundacion.
Tur grupo a haci un presentacion sea di baile of di canto hunto cu e lidernan di e grupo.
Fundacion Movemento ta Bida por wak bek ariba un aña cu hopi actividad manera e programa di “Hunto nos ta vence Embehecimento” cual ta un programa cu a wordo subsidia door de Samenwerkende Fondsen di Hulanda y controla aki door di CEDE Aruba. E programanan ta den Dakota, Tanki Leendert y Santa Cruz mientras un otro programa tambe ta na Noord. Tur e gruponan a haya dos bes pa siman les den movecion y tambe a haci diferente proyecto social y a ricibi charla di diferente personanan of instancia pa asina enrikece nan sabiduria mas ainda. E programa aki tabata pa tur hende 60 plus. Pa januari tur esaki ta start atrobe y directiva di FMTB ta mirando e posibilidad pa cuminsa e programa aki den otro districto tambe. Un danki ta bay na tur e boluntarionan cu a yuda pa e programa tabata un exito.
Tambe e aña aki tur diasabra mainta tabata tin caminata den naturalesa bou di guia di Rudy Leysner y cu lo continua den januari 2019.
Jani Brokke Memorial tabata grandi atrobe manera normal y pa aña 2019 nos ta wak un crecemento den participante. Durante aña tambe nos Simposio di Postura “Let’s sit the right way” a duna hopi informacion tocante con pa sinta p’asina no haya dolor di lomba y nos a introduci e aparato “ Upright Go”. Nos festival di canto y Nochi di Bailadonan tabata sumamente exitoso y un y tur a gosa di e anochi ey.
International tambe dos miembro di Directiva a participa na e reunion principal di RAFA PANA na Lima, Peru p’asina haya mas conocemento di tur cos nobo ariba e tereno di movemento.
Pa aña 2019 tin diferente programa nobo pa ehecuta y nos ta spera cu financieramente nos por alcansa tur esakinan.
Fundacion Movemento ta Bida kier a gradici tur sponsor, prensa y tur esunnan cu a yuda nos den 2018 deseando un y tur Feliz Dianan di Fiesta y un 2019 cu hopi Salud, Bendicion y Movemento.