Diaranson atardi FMSA a wordo sorprendi pa un conferencia di prensa cu a tuma luga na Citgo Caya Grandi, na unda cu e operador di e stacion Sra. Mariela van den Bosch a informa comunidad di Aruba cu e ta obliga di cera tanki number dos di su stacion pa motibo di negligencia di FMSA. Ta di lamenta dicho proceder y sigur FMSA ta decepciona cu e acion tuma mirando e hecho cu e referente tanki dos tin casi 20 aña den operacion, sin tabata tin problema cu e operacion cu e operador anterior. Desde 2013, Sra. van den Bosch ta e operador nobo y tampoco no a laga sa cu tin problema mientras cu Valero ta doño di VMSA te cu 2016. Ta ultimo dos aña aki, despues cu FMSA a bira un compania estatal di Aruba cu diferente kehonan ta bin dilanti.
Pa ta mas specifico cu e tanki dos aki, durante un yenamento di e tanki en cuestion door di FMSA su truck di gasolin, por a observa cu e producto gasolin a sali na un di e pompnan. Ora cu FMSA a hasi investigacion a bin resulta cu e operador actual no ta hasi e operacion manera debe ser cu e operador anterior si tabata hasi. E procedura aki a ser poni ariba papel y cu tin actualmente aprobacion di DTI cu ta GARANTISA un operacion safe di e stacion di gasolin. FMSA y GERMO (Citgo Caya Grandi) a bai di acuerdo pa hasi uzo di e procedura aki desde 24 di Juli 2018 y hasiendo uzo di e procedura aki e partidonan a sa di opera e stacion sin ningun problema desde cu e la wordo implementa.
Partidonan emberdad ta pendiente un veredicto di corte. Ta importante pa menciona cu e señora no ta respeta e kortgeding cu e mes a cuminsa y cu lo tin sentencia dia 20 di December venidero. Actuando manera eta hasi actualmente, Sra. Van den Bosch ta dicidi y ta determina sin ningun argumento tecnico valido pa stop e uzo di tanki number dos. E desishon di Sra. Van den Bosch ta mustra di no tin ningun otro intenshon cu ta pa desacredita FMSA y tambe propiedad di stacion di gasolin Caya Grandi, pa asina por cumpra e stacion di gasolin, patrimonio di e pueblo di Aruba, na un prijs irealistico.
Por ultimo, FMSA, cu un trayectoria di decadanan den operacion y distribucion di productonan petrolero na Aruba, nunca lo hasi un operacion unsafe cu lo pone bida di hende na risico. Seguridad di clientela, empleadonan di e stacion di gasolin, esnan den sercania y pueblo di Aruba en general, semper tabata y lo keda na prome lugar.