Cumpliendo cu nan responsabilidad como un bon ciudadano corporativo, e compania estatal nobo Fuels Marketing & Supply Aruba, cu ta pertenece awor na Refineria di Aruba N.V., ta bolbe lansa su campaña tradicional pa duna bek na comunidad. E aña aki ta celebra e hecho cu gasolin, diesel y jetfuel ta den nos mesun man, pero tambe ta duna bek na comunidad, den forma di un donacion cuantioso na un organisacion.
Pa 8 biaha consecutivo, FMSA ta sostene e organisacion Cruz Cora Aruba, conoci pa tur nan esfuerso pa sirbi nos comunidad, na momento cu mas nos mester di nan. E organisacion anualmente ta conta cu un donacion considerabel cu clientenan ta aporta di cada liter di gasolin cu nan yena den nan auto. Tambe e ta bin como parti di donacion cu e compania mes ta haci na e organisacion.
Orguyosamente FMSA ta un di e companianan cu ta haci un donacion substancial riba nos isla, specificamente na un organisacion cu e ultimo añanan a sa di crece y desaroya den un grupo cu comunidad por conta riba nan ora di calamidad y ora di eventonan masal. Cruz Cora Aruba a sa di progresa hopi y awendia ta un di esunnan miho prepara, tanto na boluntario, ekiponan y conocemento, den henter e region aki. No mas cu algun siman pasa a manda boluntarionan Haiti pa duna un man den e trabounan di rescate despues di pasada di horcan.
Fuels Marketing & Supply Aruba desde 1 di October 2016 ta resorta bou di Refineria di Aruba N.V. Nan tin 37 empleado bon prepara y capas pa suministra tur 13 stacion di combustibel na Aruba y na nan operacion na Aeropuerto. Nan tin 13 truck moviendo riba caretera y 8 truck riba rampa na Aeropuerto, unda nan ta tank avionnan cu Jetfuel. Anualmente e compania ta entrega mas of menos 200 miyon liter di combustibel na Aruba, den un forma sigur y eficiente.
Durante un evento special teni na oficina principal di RdA y FMSA, a haci inicio di e campaña aki cu lo sigui durante henter luna di November. Ta encurasha comunidad pa yena nan tanki pa asina nan yama danki, pa e sosten na e bon causa aki