Fundacion Museo Arubano a haci entrega di cuentanan anual 2014 y 2015 na Minister encarga cu cultura Otmar Oduber. Cu esaki kier refleha e trabou duro cu henter e team di FMA a bin ta haciendo. Cu e entrega aki ta mustra cu tur cos ta ‘up to date’ y di awo pa dilanti lo percura pa sigui entrega esakinan na ora y cuminsa traha riba 2016 Anky Vrolijk director di FMA a indica.
“Como fundacion bo mester ta hopi transparente y mi ta kere entregando e cuentanan anual ta refleha e transparencia. FMA den su structura nobo tin trabounan grandi y pa esaki mester tambe mas fondo. Mas cu nos traha cu fondo, mas bo kier mustra e transparencia aki”.
Trabounan FMA
Manera cu ta conoci a caba di habri un museo na San Nicolas “Museum of Industry”, esaki ta un refleho di e trabou di e team cu a haci cu a logra esaki. Awo ta sigui cu e siguiente plannan cu tin, manera museum di comunidad cu ta bay ta situa na Nicolaas Store. Tin mas plan na caminda cu no ta encera bin cu productonan nobo so, pero tambe pa eleva y traha hunto cu expertonan riba e area pa por hiba e mundo di museo dilanti na Aruba.
E trabou cu ta haciendo pa hiba e mundo di museo dilanti aki na Aruba ta hopi importante segun sra. Vrolijk ta splica. Pasobra, nos personanan local mester conoce mas di nos historia y ki bunita pa nos wak esaki den museonan nobo, interactivo y moderno. “Mi ta kere personanan cu ya a bishite ta hopi impresiona pa wak con e museo a keda. E plannnan ta pa keda bin cu mas museonan asina y haci nos localnan embahador di esaki. Na mes momento crea producto nobo pa locual ta turismo, pa nan conoce mas di Aruba den un otro sentido. No solamente pa recursonan natural pero tambe pa nos cultura y tur locual Aruba a bin ta conoce, nos historia y diferente otro tema.
Orario cu por bishita
E museo cu ya a habri na San Nicolas ta situa den e watertoren y ta habri di dialuna pa diasabra. Dialuna pa diabierna di 9or di mainta pa 6or di atardi y diasabra mitar dia esta di 10or di mainta pa 2or di merdia. Ta pidi un contribucion di 5 florin, esaki ta pa yuda e fundacion pa por sigui inverti bek. Tambe tin museo historico conoci bou di Fort Zoutman cu tambe ta habri di dialuna pa diasabra for di 9or di mainta pa 6or di atardi cu tambe tin exposicion nobo den dje. “Ta invita tur hende pasa e museonan, bay cu yiunan y hacie un dia familiar mientras cu ta cera conoci cu tur loke cu tin di ofrece den e museonan. Scolnan ya ta haciendo cita cu tur dos museo. Intencion ta tambe cu nos tambe ta bay mas den e scolnan pa asina duna informacion y muchanan por siña di chikito di e historia”, sra. Vrolijk a conclui.