Willemstad/Philipsburg – For di awe, 31 di mart 2025, florin karibense ta ofisialmente rekonosé komo método legal di pago den e union monetario di Kòrsou i Sint Maarten. Awe mainta, den e ofisinanan di Centrale Bank van Curaçao en Sint Maarten (CBCS) na tur dos país, tabatin e seremonia di e promé kambio di florin di Antia Hulandes pa florin karibense, realisá pa e Ministronan di Finansa, den presensia di miembronan di konseho ehekutivo, konseho di supervisor i personal di CBCS.
CBCS ta pone e moneda nobo den sirkulashon for di awe mes via e bankonan komersial. Durante un periodo di 3 luna, florin karibense lo ta sirkulando konhuntamente ku florin di Antia Hulandes (NAf), ku lo wòrdu retirá komo método legal di pago riba 1 di yüli 2025. Te e fecha ei, por sigui hasi pago kèsh ku NAf.
For di mañan, 1 di aprel 2025, klientenan ku tin kuentanan na banko komersial por kambia NAf pa florin karibense na e bankonan aki. Personanan ku no tin kuenta na banko por bai na CBCS pa kambia sèn kèsh1. Awe bankonan ta preparando nan sistemanan di transakshon di pago pa e adaptashon, inkluyendo e kambio den kódigo di moneda for di ANG pa XCG. CBCS ta konsehá públiko pa sigui e komunikashonnan di nan propio bankonan komersial tokante disponibilidat di nan sistemanan. CBCS ta spera e transishon aki ku konfiansa.
Pa mas informashon tokante florin karibense, deskargá e aplikashon My Caribbean Guilder òf bishitá www.caribbean-guilder.com. Preguntanan por wòrdu manda na [email protected] òf via telefòn na +599 9 434 5500.
