TALLAHASSEE, Fla (Merca) — E “Sunshine Protection Act” cu tin como meta pa haci Daylight Saving Time permanent na Florida, cual lo kiermen cu habitantenan di e asina yama Sunshine State lo no mester hala nan holoshi un ora tur aña na November.
Pero aunke cu e amienda a pasa den parlamento di Florida y firma door di gobernador Rick Scott shete luna pasa, habitantenan di Florida ainda lo mester hala nan holoshi bek e fin di siman binidero.
Esaki ta pa motibo cu e medida no por bin na vigor, tanten cu congreso federal no haci e cambionan legal cu lo por permiti esaki. E estado lo mester wordo exclui for di e Uniform Act di 1966; tanto Hawaii como Arizona ta excepcion, aunke cu nan ta keda ariba standard time, enbes di reconoce Daylight Saving Time.
Senador Marco Rubio a introduci dos amiendo den Senado Mericano pa facilita e ley di Florida: uno pa exclui e estado for di e Uniform Time Act, y uno cu ta bay un stap mas aleu door di haci Daylight Saving Time permanent na nivel nacional..
Rubio a bisa cu e cambio di horario ta afecta e economia agricora di Florida door cu e ta bruha e schedule di e agricultornan y ta bisa cu e Daylight Saving Time ta reduci e cantidad di accidente di trafico door di miho visibilidad.
Gobernador Scott a bisa cu e ta apoya e ley aki ya cu e lo yuda e industria di turismo di e estado. E lo permiti habitante y bishitantenan pa “disfruta tur e bunitesa tin pa ofrece mas laat durante e dia”.
E asociación di mayor – y maestronan di Florida (PTA) a pidi pa e concepto aki wordo veta pa motibo cu mas mucha lo bay scol den scuridad di mainta.