NORTH/SOUTH- CAROLINA, Merca – Ta falta poco pa e horcan Florence yega na e costa Atlantico di Merca. E awasero cu e lo trece cun’e y bientonan destructivo lo asota zonanan amplio di e pais. “E poblacion mester wanta al menos tres dia”, e hefe di polis di Charlotte- Mecklenburg, Kerr Puntey, cita pa The Charlotte Observer.
E ultimo datonan di e Centro Nacional di Horcan di Merca (NHC) a indica cu e fenomeno climatologico di categoria 2 ta conta cu bientonan sosteni di casi 170 km/h y ta moviendo den direccion di e estadonan di North y South Carolina, na un velocidad di 16 km/h. Ainda no ta sa cu precision e luga exacto unda cu e lo subi tera.
Si Florence avanza pa interior di e pais, e estadonan di Georgia, Maryland y Virgina tambe lo core peliger.