Diabierna mi a ricibi e noticia tristo cu Flor, e señora di Luis Quintero a fayece depues di a sufri basta tempo cu cancer. Apenas cinco dia anterior Luis Quintero a duna un concierto na Cas di Cultura y el a habri su programa cu un rendicion conmotivo di su propio composicion Siempre me acuerdo de ti cu el a dedica na su casa Flor. El a conta cu lagrima den su wowonan cu su casa cu semper ta compañ’e den su giranan musical no por a bin e biaha aki pasobra e tabata hopi malo.
Mi señora y ami a conoce Flor Matilde na aña 2006 y e siguiente aña atrobe nos tabatin e oportunidad di combersa cun’e. Flor tabata e manager, guia y coordinador di Luis Quintero. E tabata percura pa tur cos pa Luis pa asina Luis por a concentra riba su guitara y su musica. Durante pauze tabata Flor kende tabata bende e CDnan di Luis. Amigonan di Luis ta conta cu Luis semper tabata yam’e “mi consecuente amiga Florecita”. Flor tabata un persona humilde, cu un caracter dushi, cu un sonrisa riba su cara y semper cla pa yuda tur hende, pero specialmente su ‘querido “Lucho”.’
Flor a studia Urbanismo na Universidad Simon Bolivar na Caracas. E mes no tabata musico, pero e tabata e inspiracion di su casa, hasta cu Luis a compone un obra pa guitara clasico dedica na su gran amor cu Luis ta inclui den su conciertonan clasico.
Cu Flor Matilde Quintero haya paz den brasa di nos Señor. Palabranan di condolencia ta bay pa nos amigo Luis, nan yiu Andrés, Sra. Eunices, mama di Flor na nomber di mi señora y ami y di tur aki na Aruba kendenan tabatin e placer di conoce Flor Matilde Oquendo, esposa di Luis Quirino.