Cuerpo Policial su Flex-Team durante di e siman di dia 22 te cu 28 di october a sigui cu su controlnan regular riba vehiculo como tambe den barionan y cayanan specifico unda cu e rol preventivo di e team aki un biaha mas a resalta.
Flex-Team a patruya den areanan cu tin retonan cu aglomeracion di persona manera Lekker, Manuelito’s. Circle-K, Hotel Baccarat, e casnan di pueblo di Noord, Madiki, Sero Patrishi y Eagle Beach.
Negoshinan manera Lekker, De Olde Molen y Cas Casuela ta wordo controla pa percura pa nan mantene na e orarionan stipula den ley, y cu nan ta cera na tempo y pa no keda clientenan aglomera of para den e parkeerplaats.
Aglomeracion na Eagle Beach:
Na Eagle Beach ta semper controla adicionalmente pa cu tocamento di musica demasiado duro. E parkeerplaats di The Village tambe ta wordo controla pa check pa hobennan cu ta para bebe for di auto, si polis tin cualkier sospecho cu tin algo ilegal tumando luga nan ta listra nan y/of nan auto.
Aglomeracion riba Parkeerplaats di The Village
Tur e gruponan cu den oranan di anochi ta aglomera na altura di Eagle Beach y cu tabata bebiendo alcohol y tocando muziek duro, nan atencion a wordo hala y cori for di e luga. Personanan riba cual tin sospecho a wordo controla. E gruponan diadomingo a keda toca muziek duro te den oranan laat di anochi. Muziek duro ta wordo tolera te cu 11 or di anochi.
Detencion R. pa e pasa wayaba
Riba diasabrar 27 di october pa mas o menos 12 or y 25 di anochi, polisnan ta tuma nota cu den Ranchostraat bendemento di droga tabata tumando luga, unda cu’n Toyota Yaris tabata para mei mei di caminda. Tabata tin dos hoben para na cada banda di e auto. Esaki a lanta sospecho cu e chauffeur di e auto tabata bendiendo droga. Un rato despues ta tuma nota di e mesun Toyota aki na altura di KFC den Hendrikstraat. Durante un control pa haci nos leynan prevalece, a duna e chauffeur di e auto un señal pa e para. Pero e no a haci caso di esaki y a sigui core den Caya E Petrona, Santa Helena straat, Pita straat, den cayanan di Madiki y a bin para dilanti di su cas. E sospechoso R. naci na Aruba, pa mas o menos 12 or y 30 ta keda deteni y ta wordo hiba pa warda di polis. El a wordo trece dilanti di Fiscal.
Accion di listramento preventivo dia 27 y 28 di october
Hunto cu personal di D1 y D2 y personal di Warda Nos Costa a tuma luga un accion di listramento preventivo. Varios persona a wordo listra pero sin nada particular. Door di seccion di surveillance varios localidad a wordo controla door di Guarda Nos Costa. Varios persona cu tabata kedando ilegal ariba nos isla a wordo deteni y hiba pa oficina di WNC. Aki ta sigui un resumen di personanan deteni door Flex Team.
Detencion #1 M. relaciona cu Ley di control di arma
Durante un control na altura di walkway entre Hyatt Hotel y Barcelo ta bin nota un hoben cu tabata para mei mei di caminda. A bay over na listra e hoben aki y a confisca e siguiente articulonan: den su heuptas di e marca Adidas cu e tabata tin cun’e, a bin haya un arma di caliber 9MM y den un sakito di plastic ta bin haya un bloki parecido na Hashi. Esaki tabata motibo pa bay over na su detencion, pa 23 or y 20 pa violacion di articulo 3 lid 1 di e Vuurwapen Verordering y articulo 4 pa violacion di e Landsverordening Verdovende Middelen. E sospechoso M, naci na Aruba na 2000 a wordo deteni.
Detencion #2B, pa cu e Wapen Verordering
Riba 28 di october 2018, pa mas o menos 03 or y 50, polisnan ta tuma nota di un Honda Accord na altura di ‘De Olde Molen’, riba J.E. Irausquin Boulevard, cu tabata para na banda. Ta trata di un auto RHD. Durante un control ta bin haya un machete ariba e vloer di e banda di pasahero scondi bou di e mat. Relaciona cu esaki a bay over na detencion di e doño di e auto, yama B., naci na Haiti pa violacion di e articulo 1 di e Wapenverordering.
Detencion #3 H. relaciona cu articulo 5 di L.W.V.
Riba 28 oktober 2018 pa mas o menos 03 y 55, durante patruyahe, riba e caminda di Palm Beach pa Noord. Na altura di “Sextasy” ta tuma nota di un Isuzu D-max, color oraño cu na e momentonan ey tabata coriende zig zag ariba caminda. Pa cu esaki a duna e chauffeur un señal pa para basa ariba articulo 3 di e Landsbesluit Verkeersregel. A logra para e auto na altura di Palma Aruba. E chauffeur a wordo pidi pa baha y ta constata cu e chauffeur tabata bou influencia di alcohol. Esaki por a ripara na su wowonan cora, e no por a para straight ariba su pia, lenga pisa cu cual e tabata dirigi su mes na e polisnan. Esaki ta haci cu e chauffeur ta viola articulo 5 di e Landsverordening Wegverkeer. Tabata trata di e homber H, naci na Aruba, na 1979.
Control durante actividadnan relaciona cu Halloween
E weekend tabata uno basta druk. Tabata tin varios persona ariba caya relaciona cu fiesta di Halloween. Hopi di e clubnan tabata druk. Olde Molen tabata hopi druk ainda ariba diadoming mainta.
Spotcheck control:
A tene varios control ariba auto y a confisca cantidadnan di marihuana, sakitonan cocaina, piedra, sker, cuchiu, molina di marihuana.
Resumen di siman: Siman 43 – 2018, periodo 22 te cu 28 di october
Total a tene 63 control
Tabata tin cuater detencion:
( 1 ) Un pa pasa wayaba.
( 2) Un relaciona cu Ley di Arma
( 1) Un relaciona cu articulo 5 di L.W.V.