Pa loke ta trata e aspecto di flexibilisacion di pensioen cu Pueblo orguyoso y Respeta (POR) ta enfoca riba dje, partido AVP a menciona na diferente ocasion cu nan ta keda cu edad di 65 cu bo por cobra bo pensioen. Diferente miembro di nan fraccion den Parlamento a mustra cu nan no ta mira cu por flexibilisa esaki. Di parti di partido MEP a mira un propuesta di nan banda un tiki popular den e sentido cu ta bisa cu nan kier baha edad di pensioen na 62 aña, pero no ta papia di ki influencia esaki lo tin riba e fondo di pensioen. Ya caba nos sa cu e fondo di pensioen ta uno cu tabatin su retonan pa futuro.
‘Plan di accion’ (POR)
Nos di partido POR a pone un proposicion nos dilanti cual a haya un acogida hopi grandi den comunidad pa cual nos a haya un reaccion hopi grandi mediante e plan di accion aki caminda cu nos a bisa cu nos ta kere cu e ta husto pa crea un opcion adicional pa e pensionado caminda cu ta flexibilisa e pensioen aki no na 65 y no na 62 sino na 60 aña. Cu opcion di flexibilisacion di edad di pensioen, esun cu tincu bay cu pensioen ta dicidi si e ta sinti cu e ta bay cu 60, 62, 65 of hasta si e ta sintie fuerte, e por bay te na 68 aña. Asina e por traha y acumula un pensioen ainda mas grandi ora cu e cobra despues di 68 aña.
Cu e flexibilisacion aki no ta perhudica e fondo di pensioen, pasobra na ratio di e momento cu bo ta scoge pa bay cu pensioen bo ta ricibi bo pensioen. Esaki ta brinda e oportunidad pa e pensionado por traha na un forma hopi mas trankil hasta crea e mesun posibilidad cu tin den gobierno pa un deeltijd pensioen. Kiermen bo por traha un cierto cantidad di oranan despues di 60 aña y e resto bo ta cobre na bo pensioen cu tambe ta un alivio pe fondo di pensioen y e doño di trabou (un hende cu mas edad por traha menos ora mientras cu e ta ‘werk in’ un persona hoben den su compania pa tuma over e trabou di e persona cu poco poco ta bayendo cu pensioen). Sr. Oduber ta enfatisa cu e efectonan di flexibilisacion di pensioen ta sumamente grandi no djis pa esun cu ta bay cu pensioen. E ta bon p’e fondo di pensioen y hasta p’e empleador den e caso aki.
Belasting
Pa loke ta e belasting cu ta wordo kita for di nos grandinan, nos a mustra riba e pensioen acumulativo caminda cu ta bolbe paga riba un placa cu ya caba bo a paga riba dje. Of cu si bo tin 2 pensioen bo tincu bolbe paga riba tur dos pensioen pasobra bo ta pasa e minimum cu tin pa bo por paga bo inkomstenbelasting riba dje cual ta inhusto. Lo mester bay crea otro posibilidad/ categoria pa esaki.
Personanan malo
Un otro aspecto cu a bin hopi dilanti tambe cual POR ta bay evalua den seno di partido, ta e hecho cu Aruba tin un porcentahe hopi halto di malesanan cronico cu nos grandinan ta sufri di dje. Malesanan cu si no cuida e persona tin un “life expectancy” basta defini. Den casonan asina un persona cu practicamente ta yegando su edad di pensioen no lo haya chens di cobra su pensioen, pa motibo cu e no por traha na cierto momento debi na e malesanan cronico aki. POR ta bisa cu mester bin cu un posibilidad den e ley pa un persona den e situacion aki cu no por traha pa haya entrada y no por cobra pensioen. Pues bo ta crea un posibilidad cu toch e por bin na remarca na cierto forma pa un contribucion cu el a haci pa henter su bida.
Sr. Oduber a termina bisando cu esakinan ta algun punto sumamente positivo cu ta para den e plan di accion. E forma cu el a wordo treci dilanti aworaki ta brinda pueblo e oportunidad pa duna sugerencia pa por yega na e programa di partido definitivo cu lo wordo presenta na Juli.