Den e siman tras di lomba, esta di dia 22 pa dia 28 di Augustus, Flex-Team di Cuerpo Policial a dedica atencion adicional na e controlnan di luganan cu ta bende lotto. Esaki en conexion cu e bentanan cu tabata mas halto pa cu e Mini Mega Plus miyonario. Otro actividadnan di Flex-Team a encera e controlnan di luganan unda tin aglomeracion di hende cu potencialmente por resulta den situacionnan fastioso y problemanan mas grandi; como tambe e controlnan di luganan conoci pa benta di droga.
Riba diamars y diabierna siman pasa tabatin extra personal riba caya y a dedica mas atencion na controlanan preventivo na e casnan di loteria, como cu nan tabata mas druk cu nan ta usualmente relaciona na e benta di e Mini Mega Plus miyonario.
Otro actividadnan cu Flex-Team a efectua ta controlnan preventivo pa cu “samenscholing”, esta aglomeracion di personanan na e luganan conoci manera Manuelito’s, Circle-K, Hotel Baccarat, e casnan di pueblo na Noord, Madiki y Sero Patrishi.
A bishita tambe negoshinan manera Lekker, De Olde Molen, Cas Casuela y Cafe Capri, unda cu e controla pa doñonan mantene nan mes na e orario pa cera y pa clientenan tuma caminda pa cas mas lihe posibel despues cu e negoshinan cera. Controlnan regular na Eagle Beach tambe tabata parti di e actividadnan di Flex-Team siman pasa, unda cu a papia cu personanan cu tabata aglomera na autonan cu muziek duro, y bebiendo bebidanan alcoholico. A controla algun persona cu tabata sospecha cu nan lo ta kibrando un of otro ley.
Otro areanan di interes special, manera Arendstraat, Canoastraat, y Korvetstraat a bira parti di e controlnan regular di Cuerpo Policial, particularmente en conexion cu e ultimo tiroteo y menasanan.
Flex-Team ta raporta cu e personanan conoci pa aglomeracion dilanti di Budweiserbar, y personanan conoci pa benta di droga a wordo controla. Tur siman nan ta busca otro caminda pa sconde e droga, y siman pasa polis no a logra haya nan luga nobo pa ward’e.
Detencionnan cu a tuma luga a inclui e persona ambulante, Rafini, kende ta conoci pa polis. Den Avenida Alo Tromp polis a hay’e scondi tras di un palo cu un laptop, un pasaporte, y otro documentonan; como tabe dos grinder, un zaag, y otro obhetonan di cual ta sospecha cu ta obhetonan horta. Otro detencionnan a inclui di un turista den area di hotelnan grandi; y dos chauffeur di auto den Oranjestad; tur tabata bao influencia di alcohol.
Flex-Team tambe a acerca un persona den Avenido Alo Tromp ora cu a observa un persona ambulante tuma algo di e chauffeur di auto, y a sospecha cu ta trata di un compra di droga. Ora di control a bin resulta cu e persona no tin estadia legal na Aruba, y a detene.
Total, incluyendo e caso y controlnan menciona, Flex-Team a efectua 130 control. Nan a tuma obheto y substancianan manera marihuana, cocaina, piedra di cocaina, sker, cuchu, y grinder den beslag.
