Siguiendo den nan trabaonan incansabel pa combati criminalidad riba nos isla, Flex-Team a tene e di 29 siman di accion, entre dia 21 pa 27 di November ultimo. A actua contra gruponan aglomera na luganan conoci, manera Manuelitos, Cirkle-K, Hotel Bacarat, casnan di pueblo na Noord, Madiki y Sero Patrishi a uza man duro pa trece siguridad den comunidad. Establecimentonan manera Lekker, De Olde Molen y Cas Casuela a ricibi bishita di control y a percura pa despues di ora di cera tur hende move mas lihe caminda pa nan cas.
Siguiendo pa otro “hotspotnan” riba e isla, e team a controla den Arendstraat, Canoastraat y Korvetstraat. Esaki ta wordo haci en conexion cu e ultimo desaroyonan unda tabata tin tiramento y menasa den Canoastraat y Korvetstraat na altura di Budweiser Bar. Tur esunnan agrupa dilanti e bar a wordo listra y controla mirando cu e luga ta bon conoci como un spot di bende droga.
Control a sigui despues na e casnan di pueblo na Bushiri, Madiki Kavel, Sero Patrishi, Sabana Basora-Noord y Noord, Duartestraat y Heidenstraat. A consecuencia di e ultimo tiramento den Duartestraat y Heidenstraat na Noord, Flex-Team ta controla constantemente pa evita cu tipo di susedidonan asina por ripiti.
Tur e gruponan cu durante anochi ta reuni na haltura di Eagle Beach bebiendo alcohol y scuchando musica cu volumen halto a wordo atendi y hala for di e luga. Otro luga unda ta gusta agrupa y scucha musica cu volumen halto combina cu consumo di alcohol ta e parkeerplaats di The Village y esakinan a wordo atendi na e mesun manera cu Eagle Beach.
For di diasabra dia 26 di November cuminsando for di 6’or di atardi te cu diadomingo dia 27 di November 6’or di atardi, bao di ordo di Hues, a tene listramento preventivo pa “Vuurwapenverordening” (LVM, ley riba arma di candela y droga).
Durante e accion aki yegando na haltura di Juan Jacobstraat a bin topa cu tres persona sinta y a dicidi pa listra nan preventivamente mirando cu nan ta den un zona cayente. E listramento preventivo a conduci na detencion di M.A.F. di 47 aña, pa motibo cu den su tas a bin haya 7 saco di marihuana y uno cu un piedra di cocaina cu ta un infraccion riba ley di droga.
Durante e mesun accion cu a sigui tambe a detene dos persona pa infraccion di ley di LTU (sin permiso), tur di Venezuela. A detene e conocido di Polis “Bam Bam” Quant dilanti di KFC den un auto Hyundai Teracan shinishi. Hayando e holo di marihuana a dicidi di pidi e auto pa para, pero esaki a sigui core. A logra para e auto den Zuster Cherubinestraat unda a detene A.M.B. (BAM BAM) Q. pa posesion di un sigaria di marihuana. Fuera di e sigaria di marihuana e team a haya un tas cu mas productonan ilicito, entre otro, saconan di cocaina y placa.
Den e accion aki un di e personanan den a auto a dicidi di baha y cuminsa core bay, pero Polis a persigui y a logra gar’e y trece bek. Den auto aki a haya den e tas droga y placa den diferente denominacion como tambe un cedula cu a bin resulta di ta esun cu a core bay. A pasa tur cos pa e departamento di crimen organisa.
A para un auto sospechoso cerca di e cas di choller den St. Luciastraat unda cu e homber R.F.B., naci na Aruba tabata sinta den su auto. Ora cu e team a yega mas cerca a bin nota cu B. tabata uzando droga.
Na Eagle Beach a bin topa cu un Toyota Tercel cu ocupante M.G.Q. naci na Aruba y den e caso aki no tabatin ningun particularidad. Otro persona cu tabata na e mesun luga, E.R.F. naci na Aruba a wordo haya cu un sker den su auto y esaki a wordo kita for di dje. A sigui pa listra un otro auto cu ocupante A.A.T. naci na Aruba y den su auto a bin haya un aparato pa mula marihuana y esaki a wordo tuma den beslag.
Fuera di esakinan na diferente otro lugarnan, manera cerca di Lekker Restaurant, banda di Panaderia Moderna, Ranchostraat, banda di Imeldahof, Olde Molen y Linear Park a para diferente autonan sospechoso unda cu a haya aparatonan pa mula marihuana, sker, saconan di cu cantidad chikito di cocaina y marihuana. Tur esakinan a wordo tuma den beslag durante e controlnan haci.
En total durante e siman di 21 pa 27 di November Flex-Team a ehecuta 198 control, 23 auto a wordo para. Resultado di e accion aki tabata 4 persona deteni, 2 bao di ley di LTU y 2 bao di ley di LVM. Un accion cu a produci hopi materialnan ilicito y ta bisa esunnan cu kier anda den mundo baho cu na Aruba no tin luga pa nan.