Flex Team di Cuerpo Policial ta continuamente patruyando den diferent area y na diferente orario, y nan rol den e area di prevencion ta dunando su resultadonan. Durante di e siman di dia 3 pa 9 di October ultimo, nan a efectua 110 control y a detene 3 persona.
Flex Team ta mantene rutanan pa patruya cu ta inclui algun luga fiho y nan ta keda agrega y cambia nan rutanan basa riba indicacionnan cu un of mas area of bario ta of por bira un luga di risico halto pa diferente tipo di crimen.
Durante di e periodo menciona, nan a traha riba kibra e patronchi di aglomeracion di hende na cierto luganan conoci como puntonan unda cu dificultadnan por presenta, manera e areanan rond di Manuelito’s, Circle-K, Hotel Bacarat, y e casnan social di Noord, Madiki, y Sero Patrishi.
Ademas e controlnan basa riba orario ta sigui tuma luga na De Olde Molen, Lekker, y Cas Casuela, pa percura pa e negoshinan cumpli cu nan ora pa cera, y pa esunnan cu tabata p’aden tuma caminda pa cas mas lihe posibel.
Relaciona na situacionnan cu a envolve uzo di arma di candela algun tempo pasa, Flex Team ta mantene Canoastraat, Corvetstraat y area di Budweiserbar riba nan ruta.
Den e area di Budweiserbar ta keda controla pa e presencia di hobennan conoci como bendedonan di droga.
Eagle Beach ta keda un luga unda cu diferente grupo ta topa den oranan di anochi; nan ta consumi bebidanan alcholico y ta toca muziek duro, particularmente riba diadomingo anochi. Polis ta mantene ordo pa medio di controla cu e gruponan ta mantene nan muziek na un volumen aceptabel te cu 11’or di anochi. Si nan no cumpli cu un volumen abao di muziek, polis ta exigi pa nan bay for di e luga.
Flex Team tambe ta pasa controla e parkeerplaats di The Village. Aki diferente grupo ta keda riba e parkinglot y ta bebe bebida alcoholico. Polis ta pidi nan pa bay for di e luga y si tin cualkier sospecho cu algo contra ley ta tumando luga, polisnan ta efectua controlnan riba e personanan aki.
Detencion Rama y Hoek
Durante di e evento Urban Jungle na Centro Libertador Betico Croes, miembronan di Flex Team a topa cu un auto, modelo Toyota Altezza, cu tabata falta su capa di motor y bumper. Den e auto sinta a topa G.E. Rama, kende ta un conoci di polis, kende a laga sa cu e ta cuidando e auto pa su doño, X.A.Hoek.
Na rand di un stoel den e auto a haya un machete y consecuentemente a laga e doño sa cu ta bay listra e auto completo. Durante di e control a topa cu un pipa traha na man, shete saco cu un cantidad di yerba cu ta parce marihuana, dos artefacto pa mula marihuana y un potchi cu yerba cu parce marihuana.
Flex Team a detene tanto Rama como Hoek, inmediatamente, riba dia 9 di oktober basa riba e ley di droga (landsverordening verdovende middelen).
Detencion Gonsalves
Na e mesun evento unda a detene Rama y Hoek, e hefe di siguridad di e evento a acerca polis pa asistencia cu un hoben cu kier a drenta cu un “boksbeugel” y un potchi di glas cu un cantidad di yerba cu parecido di marihuana.
El a core bay for di siguridad, pero un rato despues siguridad a mir’e ta canta riba stage. Siguridad a entrega loke nan a haya na polis, y a indica na miembronan di Flex Team kende e hoben Gonsalves ta. E hoben a wordo deteni.
Otro obhetonan tuma den beslag
Durante di e periodo menciona Flex Team a haya y tuma den beslag den un auto durante di controlnan rutinario: cantidadnan chikito di marihuana, algun piedra di cocaina, sker, cuchiunan, machete, grinder.