Flex-Team di Cuerpo Policial Aruba a detene 7 sospechoso entre dia 12 pa dia 18 di September. E team special cu ta tene control rond Aruba y ta brinda apoyo na otro unidadnan di Polis a efectua un total di 163 control riba negoshinan y personanan den auto y na diferente luga cu ta puntonan di interes special en conexion cu entre otro bendemento di droga.
Di e 7 detencionnan, 2 tabata en conexion cu buracheria publico; 2 tabata pa posesion di droga, 1 a causa un accidente di auto bao di influencia di bebida alcoholico, 1 tabata pa estadia ilegal y 1 tabata pa posesion di e un arma (boksbeugel).
Durante di e asina yama “spot checks”, e miembronan di Flex-Team a haya y tuma den beslag saconan chikito di marihuana, algun piedra di cocaina, sker, cuchiu, machete, “boksbeugel” (brass knuckles) y artefacto pa mula marihuana.
Flex-Team, adicional di control na e luganan di custumber, ta cambia e rutanan cu nan ta core segun e necesidadnan di y desaroyonan den nos comunidad. Nan tareanan ta inclui control di areanan conoci pa aglomeracion di personanan (samenscholing) y unda cu sa tin retonan conoci pa autoridadnan, nan ta tene extra control. E areanan aki ta inclui Manuelito’s, Circle-K, Hotel Bacarat y e casnan di pueblo di Noord, Madiki y Sero Patrishi. Negoshinan manera Lekker, De Olde Molen, Cas Casuela y Cafe Capri tambe ta conta cu extra control, particularmente relaciona na nan orario di cera.
E area di Eagle Beach ta conoci como un luga unda cu den oranan di anochi hendenan ta aglomera; nan ta disfruta di bebidanan alcoholico y ta toca muziek na volumen halto. Den e area aki ta permiti pa toca muziek na volumen modera te cu 11or di anochi. Flex-Team ta controla e area pa sigura cu e regla aki ta wordo respeta y ta haci control di auto y personanan si tin cualkier sospecho cu nan por ta kibrando cualkier ley.
Ultimamente tambe Flex-Team ta controlando e parkeerplaats di The Village cu mas atencion, como cu tin aglomeracion di hende y bebemento di bebidanan alcoholico tumando luga for di bahulnan di auto riba tereno. Ta pidi esunnan bebiendo for di “bahul di auto” pa retira for di e luga y si tin cualkier sospecho cu cualkier ley ta wordo kibra ta controla e autonan y personanan concerni.
E supervision di e area di Arendstraat, Canoastraat y Korvetstraat, como tambe e vecindario di Budweiser Bar ta sigui vigente. E area dilanti di Budweiser Bar ta conoci como un luga unda ta bende droga y Polis ta duna extra atencion na e hobennan cu ta para eybanda.
Flex-Team a detene riba dia 17 di September un hoben cu tabata trahando un sigaria di marihuana den un auto para den Caya Saba, San Nicolas. E tabatin un cantidad considerabel di un yerba cu ta parce marihuana den e auto, paketa den un saco di plastic transparente. E hoben, cu ta carga fam Simmons y ta biba na Esso Heights, a keda deteni.
Riba dia 17 di September, na caya Boes Orman, cerca di Budweiser Bar, Flex-Team a mira un grupo di persona cu ya a wordo deteni den pasado pa benta di droga riba caminda publico. Miembronan di Flex-Team a listra e personanan, basa riba artikel 10, lid 1 di e ley di droga, y a haya un “boksbeugel” den e saco di carson di e homber cu fam Luelius. A detene pa posesion di arma.
Durante di control den e area di Emmastraat polisnan a topa cu un auto ta core den direccion opuesto, den verboden. Despues di a sigui e auto aki den e area, unda cu e chauffeur a pasa den diferente caya den verboden, polisnan a stop e auto bayendo den direccion di Koningstraat. E persona, naci na Venezuela, di fam Pereira Benedetti a resulta di ta na Aruba sin permiso di estadia y polisnan a detene.
Riba dia 18 di September, despues di a cera Cas Casuela banda di 4:20am, Polis a mira un auto Toyota Vitz ta core bay direccion nort na un velocidad halto, perde control y casi a bay dal den e muraya di Tanki Leendert 57. Polisnan a par’e pa coremento na un forma cu ta trece e mes y bida di otro hende na peliger. E persona, Geerman, a wordo deteni como cu e tabatin tur señal di un persona cu ta bao di influencia di alcohol. Algun ora despues, polisnan a topa cu e persona masculino di fam Marcia Jimenez panord di Amsterdam Manor Resort drumi band’i caminda den mondi y a detene pa e “ontnuchter, como cu e tabata bao di influencia di alcohol.
Durante di control banda di Lings Restaurant, Polis a topa cu un auto para band’i caminda cu un persona masculino di fam Ramos Calderon drumi den dje. E persona tabata bao di e influencia di alcohol, y polis a detene pa e “ontnuchter”. Su auto a wordo transporta pa medio di takelwagen pa e Warda di Polis na Shaba.
Riba diadomingo, dia 18 di September, durante di “surveillance” den Ranchostraat, Flex- Team a mira un homber para den un porta cu un tas preto. Ora cu a mira Polis, a move pa sconde tras di un muraya di e cas, pero a bolbe bek bay para den e porta, e biaha aki sin e tas. E cas ta conoci como un luga unda cu ta bende droga y Polisnan a sospecha cu e conducta di e persona tabata relaciona na esaki. Cu permiso di e doño di cas, polisnan a cana drenta den e cas hunto cu homber pa busca e tas preto, cual nan a haya den cas. Den e cas e miembronan di Flex-Team a topa cu un pochi cu un cantidad di yerba cu ta parce marihuana, un saco di plastic cu 35 saco chikito cu yerba cu ta parce marihuana y e identificacion di e homber di fam Gario. A tuma e substancianan den beslag y a detene e homber.