LIMA, Peru – Fiscalia Peruano a habri un investigacion preliminar pa labamento di placa contra Hiro y Sachie Fujimori y ta incui tambe e parlamentario Kenji Fujimori, tur di nan yiu di e ex presidente Alberto Fujimori, actualmente cera pa crimennan di corupcion y contra derechonan humano.
E informacion a wordo entrega pa un fuente di e Ministerio Publico. Segun e corant El Comercio a publica diabierna, den e investigacion ta busca pa clarifica e aumento di capital cu a wordo detecta den e empresa Limasa, di logistica Maritima, cu e rumannan Fujimori ta posee na Peru.
Segun e publicacion, Limasa S.A., a pasa di tin un capital di 40 mil sol (mas of menos 12 mil dollar) na 2.867.320 sol (mas of menos 870 mil dollar) na 2014. E compania a cambia di nomber na Integrated Global Logistics (IGL) y a converti den socio di e transnacional Sankyo, compania lider den logistica maritima.
Den e depositonan di Limasa, nan a haya na 2013 mas of menos 100 kilo di cocaina den algun forno di un compania priva cu lo a bay wordo transporta pa e compania. Na e momento ey, Kenji, e menor di e Fujimorinan, a sigura cu e droga por a wordo poni pa perhudik’e.
Pa inclui Kenji Fujimori den e investigacion, Fiscalia a solicita na e Congreso di lantamento di su inmunidad parlamentario. E menor di e Fujimorinan, tabata e legislador cu a obtene e mayor cantidad di voto den e ultimo eleccion.
“Mi conducta semper tabata transparente, pesey mi ta pidi e landamento di mi inmunidad parlamentario,” Kenji a skirbi riba Twitter diabierna y adhunto un carta manda pa e presidencia di Congreso pa tal fin.
El a sigura cu su rumannan “Hiro y Sachie ta wordo señala pa rasonnan politica. Mi ta duna cara pa nan y mi ta orguyoso di amos.” E rumannan a mantene nan mes leu di tur actividad politico di e partido di nan famia.
E opositor partido Fuerza Popular, lidera pa Keiko Fujimori – e mayor di e rumannan y cu no ta comprometi den e indagacion aki – ta conta cu 72 di e 130 votonan di Congreso. Su representantenan ta sigura cu e lo colabora cu e investigacionnan.
“Den Congreso no ta proteha ningun hende y nos tin un vocacion di lucha contra corupcion. Keiko Fujimori hamas a nenga e investigacionnan aki, riba dje y su famia,” e vice presidente di Parlamento y legislador Fujimorista, Rosa Bartra.
Fuente: RCN Noticias