Diabierna a sigui tratamento di e caso FIST, miho conoci como caso De Vuyst. E acusado, Jairo Chalgut, di 47 aña tabata t’ey den Corte pa tratamento di su caso.
E caso aki a wordo trata na juni, pero su abogado, mr. Demis Illes a pidi e tempo ey, pa scucha 3 testigo, cualnan lo mester a proba e alibi duna door di Chalgut. Esaki a pone cu fiscal a pospone e caso aki pendiente e investigacion forensico cu a wordo manda Hulanda.
E acusado, Jairo (Jayo) Chalgut ta envolvi den e caso FIST, cual ta e caso asesinato di de Vuyst, cual asesinato a tuma luga dia 3 di november 2017 den un cas na de Vuyst y unda e victima tabata e hoben Sarahi Sierra di 19 aña.
Fiscal ta acusa Jairo Chalgut di intencionalmente tuma bida di un persona riba 3 di november 2017, dor di choke, stik’e, hink’e cu un obheto skerpi y/of dal’e cu un obheto stompi. E violacion di e persona, secuestro y/of ladronicia di un suma di placa cu tabata mas o menos 1100 florin, tabatin como consecuencia e asesinato.
ACUSADO
Den Corte e acusado a nenga di tabata tin di haber cu e asesinato di Sarahi Sierra, pero hues a mustr’e ariba e hecho, cu a bin haya su DNA tur ariba e curpa di e victima. E victima tabata tin sperma ariba su curpa y tambe na su parti intimo, cual a match cu DNA di e acusado. Ariba esaki e acusado a bisa cu esey ta normal door cu nan dos e anochi anterior ainda a tene relacion intimo cu otro. Ariba curpa di e victima autoridadnan a haya DNA di e acusado, di e victima y un di tres, cual ta desconoci. Tambe a haya DNA ariba e saco, ariba e tape cu cual e boca di e victima tabata tapa y tambe ariba e saco pasa over di e cabes di e victima. Asina mes e acusado a keda nenga cu ta e a mata Sarahi.
FISCAL
Fiscal mr. Erades a elabora ariba e hecho cu e DNA haya ariba curpa di e victima tabata match esun di acusado/ Leynan di Aruba conoce castigo di prizon maximo 30 aña of bida largo. Esaki ta un cambio den ley, artikel 138, unda cu ley ta prescribi cu’n persona por cambia y drecha su bida. Pero den caso di Chalgut, e acusado a bay di delitonan menor y a keda escala te cu awo e lo sinta pa asesinato. Como tal e ta pidi bida largo den prizon pa e acusado