Diabierna 5 di Mei Corte den Prome Instancia a trata e caso contra di e acusado J.B.R. kende ta wordo acusa di a asesina su pareha na Januari 2016.
CASO
E caso mes a sosode dia 23 di Januari 2016 caminda cu ambulans ta wordo pidi cu urgencia pa un cas na Msg. Verrietstraat na San Nicolas caminda un dama no tabata duna señal di bida. Na yegada di ambulance a topa cu e hende muhe no ta reacciona mas, y segun e homber e lo a cay den baño dal su cabes. Personal di ambulance no sa si tabata trata di un crimen of otro caso y a solicita polis pa haci nan investigacion. Patruya na e sitio a haya holor sterki di clorox den e cas, e señora no tabata reacciona y a cuminsa cu reanimacion na prome instante cu a yega e cas y di dos ambulance a yega pa duna un man. E señora di 36 aña nacionalidad Dominicano, no a sobrevivi di e caida y asina dokter a constata morto. Patruya a bay cu e homber warda pa un interogacion pa sa kico a sucede cu e señora na cas, y con e la bin fayece despues di un golpi asina fuerte.
ACUSADO
E acusado B.R. ta nenga di a comete algun crimen. Segun e acusado, e señora a cay dal su curpa contra di un kashi, mientras cu anteriormente el a declara cu e señora lo a cay dilanti e porta y cu el a carga e señora pon’e ariba cama. Y cu ariba un doekje el a basha chloor pa asina wak si e señora ta reacciona, y tambe el a purba CPR, pero nada cu e señora tabata reacciona. E ora el a dicidi di yama ambulance pa nan bin traha cun’e.
REQUISITIE
Segun Fiscal, e victima tabata tin varios herida na cabes, un bolobonchi na su frenta, sanger na su cachete, sanger na su pecho banda rechts, e victima tabata tin un paar di ribchi kibra. Tabata e victima su curpa tabata tin yen di pleki blauw na su curpa, e kamber tabata hole puro chloro y tabata tin mancha di sanger ariba e cama. Pero patologo no por duna un causa di morto exacto.
Tambe fiscal a mustra ariba e hecho cu e acusado mes a bisa un otro detenido L., cu el a mata un hende muhe. Pero acusado ta keda para ariba su inocencia, y ora cu a puntr’e pa e holo di chloro den su kamber, el a bisa cu kisas, sin cu e tabata sa, el a benta e boter abao y esey lo a basha un tiki. Hues a mustr’e di biaha cu esey no ta para den su declaracion duna na polis, pa cual e acusado a bisa cu si el a bisa esey pero cu polisnan ta gaña hopi y cu nan mes ta perhudik’e. Pero Hues a mustra e acusado ariba e hecho cu varios punto di loke R. a bisa na e otro detenido L. ta cuadra cu e declaracionnan cu R. a duna na polis.
Tin varios testigo cu a declara cu e acusado tabata maltrata e señora severamente, na varios ocasion. Ultimo ey tabata na december cu e acusado lo a maltrata e dama dilanti di varios testigo, y ora cu Hues a puntr’e ariba esaki el a bisa Hues cu e señora tabata bira fresco ariba dje. Tin declaracionnan duna door di testigonan cu ta bisa cu varios biaha e dama tabata wordo maltrata door di e acusado.
FAMIA
Presente den sala tabata tin famia di e victima. Por a nota cu nan no tabata di acuerdo cu loke e acusado tabata declara na Hues y na mas di un ocasion, nan tabata mustra nan descontento den sala. Dado momento un guardia di CEA a acerca e famia y nan a bin compronde cu nan mester respeta sala di Corte.
EXIGENCIA
Segun Fiscal, un straf ta na su luga. E acusado a yega di wordo sentencia caba pa caso di maltrato. Na December tabata tin un denuncia di maltrato contra e acusado y na Januari e señora ta bin fayece.
Acusado R. tin un pasado di schizophrenia y psychosis pa cual el a pasa un temporada den PAAZ na 2010. Y por bisa cu te dia di awe, e ta sufri di e side- effectnan di e remedinan cu e tabata uza pa combati esakinan.
Tin tur indicacion, cu pa ora e personal di ambulance a yega pa traha cu e señora, esaki tabata morto caba y no tabata por a haci nada mas pa rebib’e. Tur cos ta indica cu e señora a muri door di sangramento interno.
Pa esaki, fiscal a exigi 12 aña di castigo di prizon pa B.R.
Hues
Hues a cera tratamento di e caso y lo dicta sentencia dia 26 di Mei, pa 8 or y 15 di mainta.