Fiscal Mayor a saca un beloning di 5.000 florin pa e tip di oro cu lo hiba na detencion y huicio di e sospechoso of sospechosonan di e tiroteo diamars 13 di september ultimo den un cas na Wayaca. Den e tiroteo aki un persona a fayece y un otro a resulta herida.
E persona cu supuestamente a drenta den e cas y a los tiro, ta fugitivo desde e momento ey. Husticia ta sali di punto di vista cu e ta ainda na Aruba.
E investigacion den e caso aki ta den plena marcha y ta den man di un team grandi di TGO, bao guía di fiscal. Recherche ta investigando tur posible pistanan. Den interés di e investigacion, lo no wordo duna mas informe na e momento aki.
Si bo ta dispone di informacion cu posiblemente por hiba na solución di e caso aki, por fabor tuma contacto cu Polis. Bo por meld cerca señor Jacobs di e Team Bijzondere Projecten na Frankrijkstraat 7 (telefon 527-3250). Bo por eventualmente yama tiplijn tambe (anónimamente) na 11141.