Diabierna mainta Corte den Prome Instancia a trata e caso contra di e homber Venezolano K.P.(23) y e Colombiano J.B.(22), ambos biba na Aruba. Nan ta wordo acusa di asesinato di conocido futbolista Johnny Gomez, cu a keda cruelmente asesina dia 30 di Juli 2016. E caso aki cu a a causa consternacion den nos comunidad, a tuma luga dilanti di Maxime Bar den Kruisweg na Playa, no mucho leu di Warda di Polis.
E futbolista J.G. a keda mortalmente hinca na su garganta, despues di un pelea den e bar ya menciona. E victima tabata drumi den un plas di sanger, ya sin bida.
E caso aki a tuma varios ora, caminda cu tanto Hues y Fiscal a haci e dos sospechosonan un serie di pregunta. Loke por a deduci ta cu e victima, den careda di 2 or di marduga, a bay busca un bebida den e bar, caminda cu nan a nenga di bend’e un bebida, pa motibo cu e bar ya tabata cera.
Durante tratamento di e caso, e tribuna den sala di Corte abou y ariba tabatin famianan di e sospechosonan presente. Cada sospechoso tin nan version di e sucedido. J.B. ta conta cu e victima a bay for di e luga, pero no a dura mucho cu el a bin bek. Ora cu el a bin bek, e muhenan cu ta traha den a bar a grita cu e victima y su amigonan tabata arma. Esaki a pone cu J.B. a drenta den panico y a bay tras di e bar, y a pasa man cu un cuchiu. Ora cu el a bin bek, e la wak K.P. y M.G. tabata bringando cu otro y cu K.P. a pidi J.B. pa e cuchiu, cual el a nenga. Pero K.P. a ranca e cuchiu for di su man y ta propina Gomez un hinca den garganta. E hinca tabata uno basta profundo, ya cu casi el a yega na e lomba di e victima.
Hues mr. Schoemaker a puntra J.B. kico tabata un intencion cu e cuchiu, y esaki a contesta cu e kier a defende su negoshi ya cu el a tende e muhenan grita cu tabata tin arma. Ora cu Fiscal a puntra J.B. si el a wak arma, el a bisa cu no, pero cu el a spanta. J.B. mes a yega cas den careda di 6 or di mainta, cu su paña tur na sanger.
Abogado defensor di J.B. mr. Chris Lejuez a bisa cu e ex amiga a bisa cu J.B. a bis’e na prome instante cu K.P. lo a hinca Gomez den barica y despues nek. J.B. ta nenga di a bisa esaki. Den sala di Corte, Fiscal hunto cu e sospechosonan y nan respectivo abogado por a wak e imagennan di e video riba un computer.
Na December ultimo, abogado di famia di e victima a entrega un demanda di 12 mil florin, mientras cu a paga 9 mil florin na Onderlinge Hulp. Otro demanda tabata di alimentacion di e yiu di e victima cu actualmente tin 13 aña.
Fiscal a mustra cu J. B. ta bisa cu ta K.S.P. a ranca cuchiu for di su man y a hinca Gomez. E anochi ey tabatin 3 pelea y tur tabata entre K.S.P. y Gomez. Segun Fiscal Gomez a wordo hinca door di K.S.P. cu hopi forsa, cu un cuchiu di 21 cm. K.S.P. a bisa e homber J.B. cu e kier sa cu el a mata Gomez pasobra el a hink’e cu full e cuchiu. Na opinion di Fiscal, e comportacion di J.B. ta mustra cu J.B. tabatin intencion di uza e cuchiu. Loke J.B. a declara no ta wordo sostene pa ningun testigo.
Segun Fiscal K.P. ta esun cu a hinca Gomez mata. J.B. ta wordo considera complice door cu intencionalmente a pasa K.P. un cuchiu. Comunidad henter a keda den shock pa e hecho aki. E famia completo a keda den estado di shock pa cual ainda nan ta bou di tratamento pa cu esaki. Fiscal a exigi 10 aña di prizon pa K.P. pa asesinato y 4 aña di prizon pa J.B. pa complicidad. Fiscal a aproba e suma 3600 Florin, cual e ta haya ta rasonabel pero no e demanda inmaterial. Tambe pa locual ta e demanda di alimentacion, Fiscal ta haya cu mester aproba e demanda aki y a pidi un medida di pago pa cual Ministerio Publico mes lo zorg pa e acusadonan paga.
Hues a cera tratamento di e caso y lo dicta sentencia dia 16 Maart pa 8.15 di mainta.