CIUDAD DE GUATEMALA (AP) — Despues di un investigacion cu a revela e supuesto nexo entre e pastoor Evangelico Carlos Luna, miho conoci como “Cash Luna”, cu e narcotraficante Marllory Chacón, e fiscal general di Guatemala a duna orden pa investigacion na e lider religioso.
Luna ta un lider Evangelico Guatemalteco cu a funda e misa Casa de Dios, cu a nenga e acusacionnan aki. Paden y pafo di e pais e ta hala atencion pa su presencia mediatico y e vida di luho cu e ta hiba.
E investigacion di Univision yama “Los Magnates de Dios” ta sigura cu e Luna ta cerca di Marllory Chacon, na kende e ta pidi placa constantemente. El a afirma tambe cu Luna tabata sa di e actividadnan ilegal di e narcotraficente, cu na 2015 a wordo sentencia na 12 aña di prizon na Merca.
Según e informe, un persona cerca di famia Chacon a splica cu el a hiba placa den efectivo pa e casa di Luna riba ordo di Chacon. E placa lo a wordo transporta den saconan di placa y tabata contene dollar y a wordo entrega na un luga conoci como Casa de los Caballos”.
Chacon tabata conoci como la Reina del Sur den e pais y durante interogacion di e fiscal Mericano a afirma cu el laba placa pa e cartelnan di droga, na un balor di 200 miyon dollar.
Pa cu e decision di Ministerio Publico, den un comunicado, Casa de Dios a rechasa e investigacion periodistico.
E investigacion di Univision a revela cue misa Casa de Dios, inaugura na 2013 tabata tin un costo di 45 miyon dollar, cifra confirma pa Luna den un entrevista cu BBC, unda cu el a afirma cu ta trata di placa duna door di e feligresnan.
E informe ta revela cu e lider religioso ta mobilisa su mes den un avion priva cu tabata tin un costo di 2 miyon dollar y un remodelacion pa 250 mil dollar.