Fiscal a exigi 25 aña pa e dos sospechosonan den asesinato Wayaca

0
RBC Juli 2018
Funmiles-2018

Diabierna, 2 Maart 2018, Corte di Prome Instancia a trata e caso contra J.P.E y P.S.F. caminda cu nan ta wordo acusa di a mata e señora “Sasha” Fong.

TRATAMENTO DI CASO
Prome cu e tratamento di e caso a cuminsa, a duna ordo pa separa e dos famianan, ya cu, pa evita conflicto, no tabata kier a pone nan tur den un solo sala. Famianan di e victima tabata tin un t-shirt bisti “Justice for Sasha” y na prome instante a nenga e personanan cu tabata tin e t-shirt aki bisti, pa drenta den sala di Corte, pero despues a laga nan pasa toch. A dicidi di manda famianan di e acusado P.S.F. sinta ariba y famia di e victima a keda sinta abao.

REKISITORIO
Fiscal mr. Kardol a cuminsa cu e tratamento di caso, repasando tur loke a pasa e dia ey, 13 September 2016, caminda cu’n persona, den e caso aki, J.P.E. a drenta den e cas cu e intencion di tira un atraco. Tabata pa 13:11 cu polis a haya melding di un atraco cu consecuencia fatal cu a tuma luga na Wayaca. A bin haya e victima su mannan mara cu tiewrap y cu’n perforacion di bala na su cabes. E sospechoso E. a declara cu e ta esun cu a drenta den e cas. Ora el a yega na e cas, el a topa cu e meneer Fong (casa di e victima) pafo na su auto. El a duna e meneer ordo pa bay paden. Paden a haya e victima, Sashah den cushina, preparando cuminda di merdia pa su yiu y nietonan. El a duna ambos persona ordo pa nan drumi ariba vloer. E señora a coopera pero e meneer si tabata protesta contra di e acto. Dado momento, el a lanta e señora for di vloer pa hib’e den camber, na unda cu lo tabata tin e cartera cu placa aden como tambe joyas. Pero ya caba e sospechoso E., a ranca un cadena for di e garganta di e victima. El a yuda e señora lanta, ya cu e señora mes a bis’e cu su so no por lanta for di ariba vloer. Nan a bay den e camber, unda cu el a pone e señora sinta ariba e cama y a cuminsa rondia tur loke ta placa y joyas den e camber. Mientras tanto, a bira merdia y ta custumber cu e casa di e victima ta busca e nietonan na scol. Door cu e welo no a bay, e yiu homber C.W.F. a bay paden pa wak e dicon e tata no a busca e nietonan na scol. Ora cu el e drenta paden, el a bin topa cu e situacion. E sospechoso E., a mik e pistol ariba C.W.F. y esaki su prome reaccion tabata di tapa su cabes cu su mannan. Dado momento e yiu a bira saca un careda bay pafo bek, cu E. su tras. E tata a dicidi di pasa man cu’n kruk pa e bay dal E cun’e, pero E., a bira bin bek y ora el a topa cu e tata el a los un tiro, cu a raak e tata (casa di e victima) na su schouder. Mientras tanto, e Sra. Sasha, e victima a cera e porta di cushina na lock. E. a drenta den panico y a los un tiro ariba e porta. Segun E., fiscal a sigui bisa, cu su intencion tabata pa drenta paden pa e bay coy e tas cu el a bin cun’e. E bala a perfora e bentana di e porta cual tabata intencion di E. pa asina habri e porta y bay paden busca su tas. E ta keda para ariba cu e no a wak e señora para na e porta. Aunke su declaracion inicial na polis ta mustra lo contrario, cu si el a wak e señora door di e glas, pero cu e no a pensa nunca cu e tiro ey cu el a los, lo por a raak e señora. Ora el a drenta paden, cu ela wak e señora benta abao, el a drenta den panico y tabata busca manera di huy. Pero prome cu esey, el a bay paden pa e coy su tas. Den e tas e tabata tin serbete mas paña pa cambia.

Den su poder E tabata tin caba un yabi di auto, tres celular y e cartera cu placa cu el a coy for di e tata. Aki ta caminda hues a puntra E., cu si e tabata den panico dicon e no a gewoon core bay pero a pensa si di subi un auto y bay for di e sitio. Na caminda ela yama P.S.F., y a bis’e cu cos a bay malo durante e asalto y pa bin busk’e na e club caminda nan ta hiba ijs (Club di Sportboys).
Akinan ta caminda nan a coy rumbo pa Palomarga, unda cu nan a bay deshaci (kima) evidencia. Pero mientras cu E. tabata kimando e evidencianan, F. a bay cu e arma y a pone den e compressor di e freezer di e auto di ijs. Despues di esey, segun E., e dia a sigui normal manera nada no a pasa. Hasta nan a sigui traha manera nada.
Ta danki na e bon trabao di e Cuerpo di Recherche y tipnan valioso for di testigonan, cu a declara cu e persona cu a laga e auto Honda atras, a subi un Pick Up Dodge Ram, color shinishi.Na principio a kere cu lo tabata un Toyota Hilux. Cu permiso di Hues Comisario a manda pidi tur e imagennan di camara, di varios locacion. A base di e imagennan, a manda pidi un registro di tur e doñonan di Dodge RAM na Aruba. Y a base di e number di auto, a bin constata cu e number en cuestion ta pertence na un Dodge RAM, cual doño ta P.S.F. Tambe hues comisario a duna permiso pa tap nan telefon y asina via esaki, a conecta nan dos nan otro, esta E. cu F. Esaki a conduci na detencion di J.P.E. y S.P.F.
Por bisa cu F. ta esun cu a abusa di e vulnerabilidad di E., pa asina pone comete un acto cu despues a a caba den morto di un di e habitantenan.

DECLARACION DI E.
E sospechoso a admiti di a comete e acto, pero e no a haci ‘zomaar’. El a haci’e pasobra cu F. a pidi’e pa haci’e. Na prome instante E. a nenga pero despues a bay di acuerdo, momento cu F. a haci bofon di dje, na un manera di reto, cu E. lo no tin e guts pa comete e atraco. Segun E., ta e mesun F. a bah’e na Wayaca.
E atraco tabata algo planea pa motibo cu dos biaha F. a huur auto cu glas getint pa asina vigila e movecionnan di e famia. E. ta bisa cu e motibo cu F. a planea e atraco tabata pasobra cu e tabata tin mester di placa pa saca algun ekipo cu el bestel for di China. E. ta bisa cu F. semper a yud’e, a yud’e cu placa, y cu E lo mester a paga den 2 aña di tempo. El a sinti cu e tin e obligacion pa haci loke F. a pidi’e, esta di tira un atraco den cas di su famianan. Segun E., e idea tabata ta pa laga pasa cu casa di e victima, tabata den baho mundo y cu hendenan di baho mundo a bin pa likid’e.
E. ta sigui bisa cu F. tabata tin mester di cen y cu el a cont’e di un kluis cu tin den e baño. Aunke cu F. ta nenga esaki, fiscal y hues ta haya cu, si E no conoce e famia, con e por sa di e kluis su existencia? E kluis aki a wordo kita, durante e remodelacion di e cas en cuestion, pero famianan nunca a bisa niun hende nada.

DECLARACION DI F.
F. ta nenga rotundamente di tin di haber cu e caso aki. E motibo pa cual F. a bay busca E. tabata cu paso e semper ta pidi’e lift. Y e biaha aki e no tabata un excepcion. F. ta admiti di a baha E. na Wayaca, pero segun F., ta custumber di E., di bishita su/un chick na Wayaca. Pesey e dia ey e no a pensa cu E. lo tabata tin otro intencion. Ora cu E. a yam’e pa bay busk’e, e no a hay’e prome biaha. A bay dal un di dos rond, e ora el a bin haya E. Pero F. ta bisa cu e no a ripara cu si e paña of e man di E. tabata na sanger. A pesar cu E. ta bisa cu e tabata tin un tas cun’e, segun F. , E no tabata tin un tas, pero un saco preto di sushi. Fiscal a puntra F., cu si E. a cont’e kico a pasa, F. a contest’e cu si. A bin e pregunta, pakico F. no a yama polis? Segun F., el a wordo menasa door di E., cu si e bisa algo, e tambe lo haya. Remarcabel ta cu loke F. tabata declara den Corte, ta lo contrario di su declaracion na polis.

HUES
Hues mr. Angela, a bisa cu segun e rapport di sikiatra y sicologo cu a evalua J.P.E. den KIA, E. ta sufri di ADHD, anti-sociale stoornis, direct anti-sociale persoonlijkheidstoornis. Tambe E. a admiti di ta uzado di marihuana. Y esey tin influencia ariba su comportacion. Tin cierto riesgo cu den futuro, si e no haya su tratamento e lo por bira agresivo. Pesey ta recomenda pa e haya un tratamento y pa e cay full bou di Reclassering, pa via di Reclassering, e sali for di su ADHD y kita su adiccion for di e marihuana.

ABOGADO ACUSADO E
Abogado di J.P.E., mr. Vito Carlo a trece padilanti cu na su opinion, e preguntanan cu fiscal, mr. Kardol tabata haci na su cliente tabata mas bien, cu e ta pone palabra den su cliente su boca. Manera forsa su cliente bisa admiti algo cu e no haci. El a sigui bisa cu si fiscal tin algo di puntra, e puntra direct y no keda formula palabranan y pone trampa pa su cliente. Tambe el a bisa cu, a pesar cu su cliente a pidi pa haya tratamento den KIA, den casi dos aña cu e tin cera, ainda e no a haya esaki. Y esaki ta vital pa E.

ABOGADO ACUSADO F
Abogado di S.P.F., mr. Peter Mohammed a bisa cu e storia cu E. kier bin cun’e, pa acusa su cliente di complicidad no ta klop. Su cliente no tabata tin falta di placa ya cu tempo cu e atraco a tuma luga, e tabata tin bon cen na banco. Dus no por culpa F. cu door cu e tabata tin mester di cen, el a forsa E. pa bay comete e atraco, cu despues a resulta fatal. Pa mr. Mohammed, su cliente mester wordo laga liber. Su cliente ta inocente di tur loke e ta wordo acusa di dje.

DEMANDANTE
Na nomber di famia Fong, Sra. Elaine Fong a bin dilanti unda cu el a hiba algun palabra den Corte. El a conta cu su famia a ricibi S.P.F. dia cu el a bin di China 27 aña pasa. Ora cu el a hay’e den problema cu su famia, ta e mesun señora cu el a manda mata, tabata esun cu atrobe a saca un man yud’e. Pasobra esey tabata su manera di ta. Nan a entrega un demanda pa daño material na balor di 50 mil florin y daño inmaterial, na balor di 17 mil florin. Fiscal a bay di acuerdo cu esaki.

CONCLUSION
P.F. ta complice, apesar di cu e ta nenga di ta involucra. Pero segun mr. Kardol, F. ta mes tanto culpabel cu E. Esaki ta pasobra cu F. ta e autor intelectual di tur esaki. A planea esaki pa un luna largo. A hasta bay asina leu di huur un auto cu glas getint, pa asina vigila tur movecion di e habitantenan di e cas. Por lo tanto, ta haya legalmente proba cu F. ta involucra den e hecho lamentabel aki. Na prome instante J.P.E. no a basha abao ariba F. pero ta despues a bin haci esaki. E punto importante ta cu niun hende cu no ta famia no tabata sa di e kluis den baño. Y esaki ta un famia so por a conta F. Esaki ta suficiente prueba cu F. tabata na altura di tur cos. Ora cu E. a conta F. tur loke a pasa, esaki a contest’e cu e mester a tira nan tur. Homicidio of morto door di homicidio (moord door doodslag) ta mesun castigabel. Fiscal a haci enfasis ariba e hecho cu aki na Aruba e castigo maximo ta 30 aña of bida largo. Den e caso aki, tata y yiu (nan) a keda traumatisa. E tata lo mester busca yudansa pa su trauma. Pero pa F. tabata importante cu e tabata tin mester di placa. Niun di dos a mustra remordimiento di loke nan a haci. Pa loke ta E. esaki tin di haber cu su problemanan mental.

CASTIGO
Fiscal a pidi 25 aña di castigo pa ambos acusado. Castigo maximo na Aruba ta di 30 aña y den e caso aki, hues Angela por bay d acuerdo cu e ponencia di fiscal of por bah’e y te hasta subi e castigo pidi door di Fiscal. Hues a cera tratamento di e caso y lo dicta sentencia dia 23 Maart proximo pa 8 or y 15 di mainta.

Comments

comments

C: Heineken
new india