Pa basta tempo hopi hende ta puntra ken ta FIOD pa cual Sra. Mervely Romano di Servicio di Impuesto ta splica ken e departamento aki ta y kiko ta su rol pa Departamento di Impuesto.
Si un cliente no ta cumpli cu su pagonan na Departamento di Impuesto, den caso asina FIOD ta manda e caso pa Ministerio Publico y e ta bira un caso penal e ora. Ministerio Publico na su turno ta dagvaard e cliente. Departamento di Impuesto hunto cu FIOD lo interoga e cliente, pa mi motibo e no ta haciendo declaracion di belasting y e cliente lo mester haci su declaracionnan.
E proceso ta sigui cana, despues Ministerio Publico ta dagvaard e cliente pa lag’e sa ki dia e ta presenta dilanti di hues. E ora e cliente ta hay’e dilanti hues y splica e hues e pakico e no a haci su declaracionnan di Inkomstenbelasting.
Segun Sra. Roman, dado momento hues por impone un veredicto. E por sanciona e cliente, e por dun’e un boet of e por dun’e tambe un castigo di cuater aña di prizon segun nos leynan. Of un boet di maximo di 100 mil florin, door di simplemente no haci declaracion di Inkomstenbelasting. Ta castigonan hopi pisa, door cu e caso ta bira uno penal, e veredicto di hues ta bay wordo nota den e strafkaart di e persona. Y e persona ta keda cu’n mancha den su strafkaart, pa motibo di belasting.
Esey no tabata necesario segun Sra. Meverly Romano, vocero di Departamento di Impuesto. P’esey ta importante pa e cliente cumpli cu yenamento di e formulario di declaracion. E cliente no mester yega asina leu y si e ta cumpli cu e declaracion, esey caba ta hopi importante, y p’e mes e ta bon , pa motibo cu cumpliendo cu su declaracion e ta bisa e Inspector di Impuesto, cu esaki ta e entrada real y su gastonan, asina nan por haci un calculacion realistico di kico ta su entrada fiscal y e ora e ta bay paga belasting tambe ariba su entrada fiscal real.